Salmo 122 - Papiamentu Bible 2013

SALMO 122 Resa pidi pas pa Herusalèm

Kantika di peregrinashon. Di David.

¹ Ki alegria, ora nan a bisa mi: ‘Ban kas di SEÑOR!’

² I awor, ata nos pará paden di bo portanan, Herusalèm!

³ Herusalèm, siudat bon konstruí segun plan harmonioso:

⁴ t'aya e tribunan ta subi, tribunan di SEÑOR, manera ta lei na Israel, pa alabá SEÑOR su nòmber.

⁵ Aya tin e tribunalnan di hustisia, esnan di kas di David.

⁶ Resa pidi pas pa Herusalèm: ‘Prosperidat pa nan ku ke bo;

⁷ laga tin pas entre bo murayanan, trankilidat den bo palasionan!’

⁸ Pa amor di mi rumannan i amigunan mi ta bisa: ‘Pas pa bo!’

⁹ Kòrdando kas di SEÑOR, nos Dios: ‘Dios bendishoná bo!’