Salmo 120 - Papiamentu Bible 2013

SALMO 120 Salba mi, SEÑOR, di esnan ku ta odia pas

Kantika di peregrinashon.

¹ Den mi ansha mi a sklama na SEÑOR i El a rospondé mi.

² SEÑOR, libra mi di lep mentiroso, di un lenga gañadó.

³ Kiko Dios lo duna bo, kiko mas, o lenga gañadó?

⁴ Flechanan skèrpi di sòldá, karbon di indju sendé.

⁵ Ai, mi pober mester biba na Mèshèk, meimei di tènt di Kedar!

⁶ Ya mi ta biba muchu tempu serka nan ku ta odia pas.

⁷ Ora ami ta papia di pas, nan ta buska guera.