Salmo 115 - Papiamentu Bible 2013

SALMO 115 Riba SEÑOR so bo por konfia, riba ningun otro

¹ Duna gloria, no na nos, SEÑOR, no na nos, sino na bo nòmber pa motibu di bo amor i fieldat,

² pa paganonan no tin ku bisa: ‘Na unda nan Dios ta porfin?’

³ Nos Dios? Ta den shelu E ta! Kiko ku E ke E ta hasi.

⁴ Nán diosnan ta blo plata i oro, kosnan trahá pa man di hende.

⁵ Nan tin boka — ma nan no por papia, nan tin wowo — ma nan no por mira;

⁶ orea nan tin — ma no por tende, nanishi tambe — ma nan no por hole;

⁷ nan tin man — ma nan no por fula, nan tin pia — ma tòg nan n' por kana, fo'i nan garganta nan n' por saka zonido.

⁸ Enditu sea esnan ku a traha nan, sí, tur esnan ku ta konfia riba nan.

⁹ Israelitanan, konfia den SEÑOR! — Nan yudansa, nan eskudo E ta! —

¹⁰ Saserdotenan, konfia den SEÑOR! — Nan yudansa, nan eskudo E ta! —

¹¹ Tur ku ta sirbi SEÑOR, konfia den djE! — Nan yudansa, nan eskudo E ta! —

¹² SEÑOR ta kòrda riba nos, sigur l'E bendishoná nos, bendishoná pueblo di Israel, bendishoná tribu di Aaron,

¹³ bendishoná tur ku ta sirbi SEÑOR, chikitu no ménos ku grandi.

¹⁴ Mare SEÑOR hasi boso numeroso, numeroso, boso mes i boso yunan.

¹⁵ Bendishoná sea boso pa SEÑOR, ku a traha shelu i tera.

¹⁶ Shelu, esei ta di SEÑOR, pero tera El a duna hende.

¹⁷ N' ta mortonan ta gaba SEÑOR, ningun di nan ku a baha bai Silensio.

¹⁸ Ma nos sí ta alabá SEÑOR for di awor te den tur eternidat. Alabá sea SEÑOR!