Salmo 114 - Papiamentu Bible 2013

SALMO 114 E milager di Israel su salida fo'i Egipto

¹ Ora Israel a sali fo'i Egipto, ora famia di Yakob a bai laga e pueblo ku su lenga bruhá,

² Huda a bira SEÑOR su santuario, Israel a bira su dominio.

³ Mirando esei Laman Kòrá a hui i riu di Yordan a hala bai;

⁴ serunan a bula manera karné, seritunan manera yu 'i kabritu.

⁵ Kiko a pasa, laman, ku bo a hui, abo, Yordan, ku bo a hala bai?

⁶ ku boso, serunan, a bula manera karné, boso, seritunan, manera yu 'i kabritu?

⁷ Tera, tembla dilanti di SEÑOR, den presensia di Dios di Yakob,

⁸ E ku a kambia baranka na lagun i piedra duru na fuente di awa.