Salmo 112 - Papiamentu Bible 2013

SALMO 112 Felis bo ta, si bo ta hende hustu

¹ Felis ta un hòmber ku rèspèt pa SEÑOR, ku ta stima su mandatonan di henter su kurason.

² Su yunan lo ta hende poderoso den pais, generashon di piadosonan lo ta bendishoná.

³ Rikesa i bonansa ta biba den su kas, e bon ku e ta hasi lo keda pa semper.

⁴ Pa bon hende un lus ta sali den tiniebla: Esun piadoso, kompasivo i hustu.

⁵ Felis t'esun ku tin heful i ku sa fia hende, ma ta regla su asuntunan manera mester ta.

⁶ Un hende asina nunka lo no faya; semper nan lo sigui rekordá un hende hustu.

⁷ Lo e no tin miedu di ningun mal notisia, e ta sintié sigur konfiando den SEÑOR.

⁸ Su kurason ta trankil, e no konosé miedu, te ora, na final, e vense su enemigunan.

⁹ E ta parti ku man generoso pa esnan ku tin mester, e bon ku e ta hasi lo keda pa semper. Ku dignidat e ta hisa su kara na laria.

¹⁰ Un mal hende ku ta mira esei ta kunsumí, e ta kome djente para kaba na nada. Mal intenshon di pekadó ta frakasá.