Salmo 110 - Papiamentu Bible 2013

SALMO 110 Dios ta primintí su rei saserdotal viktoria

Di David. Un salmo.

¹ SEÑOR a bisa mi shon: ‘Sinta bo aki na mi man drechi, miéntras Mi ta hasi bo enemigunan un banki pa bo pia sosegá.’

² For di Sion SEÑOR lo entregá bo e bastòn, señal di bo poder: manda te den tera di enemigu.

³ Bo pueblo ta sigui bo ku gustu dia bo mustra bo poder. Bistí di fiesta sagrado ata bo guereronan hóben — serena for di seno di ourora!

⁴ SEÑOR a hura — l'E no kibra su palabra —: ‘Lo bo ta saserdote pa semper di rango igual ku Melkisedèk.’

⁵ Señor ta pará na bo man drechi: l'E bati reinan dia ku E rabia.

⁶ Rei lo sentensiá nashonnan, tur kaminda lo tin kadaver! Lo e bati kabesnan kibra rònt di henter e lugá.

⁷ L'e bebe awa for di riu kant'i kaminda, kaba hisa su kabes altu na laria.