Salmo 11 - Papiamentu Bible 2013

SALMO 11 Serka SEÑOR mi ta fo'i peliger

Pa maestro di kanto. Di David.

¹ Serka SEÑOR mi ta buska mi refugio. Ki mishi anto boso bisa mi: ‘Hui manera para bai den seru.

² Malechornan ya ta arma nan bog, pará kla ku flecha riba kuèrdè pa tira den sukú riba inosentenan.

³ Ku nan ta kibra asta fundeshinan, kiko hende drechi ke hasi?’

⁴ Ma SEÑOR ta den su tèmpel sagrado, E ku tin su trono den shelu; su wowonan ta wak ku atenshon, su mirada ta listra yu di hende.

⁵ SEÑOR ta tèst hende hustu i pekadó. Di henter su kurason E ta odia esnan ku ta gusta violensia.

⁶ Riba pekadónan E ta yobe karbon sendé i suafel; un bientu kayente ta nan suerte.

⁷ Pasobra SEÑOR ta hustu i E ta gusta un kondukta ku ta hustu. Hende sinsero lo mira su Kara.