Salmo 108 - Papiamentu Bible 2013

SALMO 108 Dios so por yuda nos

Kantika. Salmo di David.

¹ O Dios, mi kurason ta prepará, mi ke kanta i toka salmo pa Bo; ban mira, mi alma!

² Lanta, arpa i siter, mi ke kanta saka solo.

³ Mi ke gaba Bo, SEÑOR, serka pueblonan, kanta bo gloria bou di nashonnan,

⁴ pasobra grandi ta bo amor bondadoso, asina grandi ku e ta pasa riba shelu; bo fieldat ta yega te na nubianan.

⁵ Alsa Bo, SEÑOR, te riba shelu, laga tera ta yen di bo gloria!

⁶ Pa bo yunan stimá por haña libertat: salba nos ku bo man fuerte, skucha mi!

⁷ Fo'i den su santuario Dios ta bisa: ‘Triunfante lo Mi parti Sihem, lo Mi midi e vaye di Sukot.

⁸ Guilead ta di Mi, di Mi ta Manase, Efraim ta e hèlmu pa tapa mi kabes i Huda lo sirbi Mi pa bastòn di mando.

⁹ Pero Moab lo ta mi palangana, pa tuma poseshon di Edom Mi ta pisa mi sambarku riba dje, riba Filistea lo Mi kanta viktoria!’

¹⁰ Ken lo hiba mi den e stat fortifiká, ken ta bai mi dilanti te den Edom,

¹¹ si Abo, o Dios, rechasá nos i no sali mas ku nos trupanan?

¹² Ai, yuda nos kontra enemigu, komo yudansa di hende ta enbano.

¹³ Huntu ku Dios nos lo bringa ku kurashi; t'E lo machiká nos enemigunan.