Salmo 107 - Papiamentu Bible 2013

SALMO 107 Den tur peliger Bo ta semper nos refugio

¹ Alabá SEÑOR komo E ta bon, pasobra su amor ta eterno!

² Mare por papia asina esnan ku SEÑOR a salba, a reskatá for di man di enemigunan,

³ a trese huntu for di teranan straño, for di ost i di wèst, for di nort i for di kosta di laman.

⁴ Tin ku a dualu den desierto, mondi seku, sin por a haña kaminda pa un lugá habitá pa hende.

⁵ Nan a pasa hamber i set i nan forsa a hera di kaba,

⁶ ma den nan ansha nan a sklama na SEÑOR i El a saka nan for di den pèrtá.

⁷ El a laga nan kohe kaminda drechi pa nan a alkansá kualke pueblo.

⁸ Laga nan gaba SEÑOR pa su bondat, pa su milagernan pa yunan di hende!

⁹ Hende ku set El a duna di bebe, hende ku hamber El a kolma ku su biennan.

¹⁰ Tin ku tabata sintá den skuridat, den tiniebla profundo, prezu di tristesa i di kadena,

¹¹ pasobra nan no ker a tende pa Dios i a despresiá plan di Altísimo.

¹² Dios a kibra nan balor ku trabou duru, anto si akaso nan a kai no tabatin hende pa yuda.

¹³ Ma den nan ansha nan a sklama na SEÑOR i El a saka nan for di den pèrtá.

¹⁴ El a saka nan for di skuridat, for di tiniebla profundo, kaba El a kibra nan buinan.

¹⁵ Laga nan gaba SEÑOR pa su bondat, pa su milagernan pa yunan di hende,

¹⁶ SEÑOR ku a kibra portanan di bròns i a plama rèndunan di heru na wèrki.

¹⁷ Tabatin hende sin sintí, sufriendo pa motibu di nan bida di maldat, mizerabel pa motibu di nan krímennan.

¹⁸ Nan stoma a wal di tur kuminda, ya nan a yega na porta di morto.

¹⁹ Ma den nan ansha nan a sklama na SEÑOR i El a saka nan for di den pèrtá.

²⁰ El a manda su palabra i a kura nan, i a libra nan di pèrdishon.

²¹ Laga nan gaba SEÑOR pa su bondat, pa su milagernan pa yunan di hende.

²² GradisiÉ, ofresiendo sakrifisionan i konta yen di entusiasmo di su obranan.

²³ Tin ku a subi laman i hasi negoshi riba awa.

²⁴ Nan a mira SEÑOR su obranan, su maravianan riba oséano.

²⁵ El a manda: a lanta un orkan, un bientu ku a lanta ola grandi.

²⁶ Nan a bai laria, bolbe kai den fondo, nan kurason a kai den e mal tempu.

²⁷ Nan a trompeká riba otro, a zeilu manera buraché, tur nan saber no a sirbi nan pa nada.

²⁸ Ma den nan ansha nan a sklama na SEÑOR i El a saka nan for di den pèrtá.

²⁹ El a kambia orkan na un brisa, olanan a kalma atrobe.

³⁰ Nan a keda kontentu ku e kalmu, Dios a guia nan na e haf deseá.

³¹ Laga nan gaba SEÑOR pa su bondat, pa su milagernan pa yunan di hende!

³² Engrandes'É den gran reunion di pueblo, alab'É den konseho di ansiano!

³³ SEÑOR a hasi riunan bira mondi, fuente di awa lugá seku seku;

³⁴ El a kambia tera fértil na saliña pa motibu di maldat di e habitantenan,

³⁵ El a troka desierto na lagun, tera seku na lugá yen di awa.

³⁶ Ei El a duna hambrientonan lugá: nan a funda un siudat pa biba aden.

³⁷ Kaba nan a sembra kunuku i a planta hòfi di wendrùif, ku a duna fruta abundante pa kosecha.

³⁸ El a manda bendishon i nan a rende, ni nan bestianan E no a laga mengua,

³⁹ nan, — un ten mashá tiki —, oprimí, den gara di desgrasia i pena!

⁴⁰ Hende altu El a tapa ku bèrgwensa, laga nan dualu den mondi sin kaminda.

⁴¹ Ma hende pober El a lanta fo'i mizeria, El a laga nan famianan rende bira hopi manera rebaño.

⁴² Bon hende ta mir'é ku alegria, ma laga maldat sera boka.

⁴³ Ken ta esun inteligente? Lag'é tuma esaki na kuenta, bira konsiente di fabornan di SEÑOR!