Salmo 103 - Papiamentu Bible 2013

SALMO 103 Mi alma, sí, henter kreashon, alabá SEÑOR pa su bondat

Di David.

¹ Mi alma, alabá SEÑOR, tur loke tin den mi, alabá su santu nòmber!

² Mi alma, alabá SEÑOR, no lubidá ningun di su fabornan:

³ E ta pordoná bo tur bo kulpa i ta kura bo di tur bo dolónan.

⁴ E ta salba bo bida for di graf, ta rondoná bo ku bondat i ku ternura.

⁵ E ta kolma bo añanan ku biennan, bo hubentut ta renobá manera un águila.

⁶ SEÑOR ta perkurá pa tin hustisia, pa tur hende oprimí haña derecho.

⁷ El a siña Moises su mandamentunan i yunan di Israel su echonan.

⁸ SEÑOR ta kompasivo i tierno, yen di pasenshi i bondat amoroso.

⁹ E n' ta sigui akusá bo ketu bai, E n' ta keda rabiá pa semper.

¹⁰ E n' ta trata nos konforme nos pikánan, E n' ta paga nos di akuerdo ku nos kulpa.

¹¹ Mes altu ku shelu ta fo'i tera mes inmenso ta su amor riba su fielnan.

¹² Mes leu ku pabou ta di pariba E ta tira nos pikánan for di nos.

¹³ Manera un tata ta tierno pa su yunan, SEÑOR ta tierno pa esnan ku respet'É.

¹⁴ E sa di ki material nos t'engendrá, E n' ta lubidá ku nos ta stòf.

¹⁵ Hende — su bida parse yerba, manera flor di kunuku e ta floria.

¹⁶ Ku bientu pasa riba dje, e n' t'ei mas, su pida tera no sa nada mas di dje.

¹⁷ Ma bondat di SEÑOR ta eterno, eterno pa esnan ku respet'É; su hustisia ta pa yunan di nan yunan,

¹⁸ pa esnan ku ta warda su aliansa i ta kòrda kumpli ku su òrdunan.

¹⁹ SEÑOR a pone su trono den shelu, E ta rei riba tur tur kos.

²⁰ Alabá SEÑOR, boso, su angelnan, sernan tan fuerte i poderoso, ku ta ehekutá su mandamentunan, skuchando loke E ta manda.

²¹ Alabá SEÑOR, tur su ehérsitonan, su sirbidónan, kumplidó ku su deseo.

²² Alabá SEÑOR, tur su obranan, na tur lugá kaminda E ta reina. Mi alma, alabá SEÑOR!