Romanonan 8 - Papiamentu Bible 2013

Spiritu Santu ta duna bida

¹ Ke men antó, awor akí no tin kondenashon pa esnan ku ta uní ku Kristu-Hesus.

² Pasobra e lei di Spiritu ku ta duna bida den Kristu-Hesus, a libra bo di e lei di piká i morto.

³ Dios a hasi loke Lei di Moises no por a hasi, ya ku naturalesa pekaminoso di hende tabata stroba e Lei akí. Kiko Dios a hasi? El a kondená piká den hende dor di manda su mes Yu den kondishon di hende pekadó, komo sakrifisio pa kita piká.

⁴ El a hasié pa nos por kumpli eksaktamente ku loke Lei di Moises ta eksigí di nos, nos ku no ta biba segun nos naturalesa pekaminoso, pero segun Spiritu Santu.

⁵ Pasobra esnan ku ta biba segun nan naturalesa pekaminoso, solamente ta empeñá pa sigui nan mal deseonan, pero esnan ku ta biba segun Spiritu Santu, ta empeñá pa sigui loke ta di Spiritu Santu.

⁶ I e moda di pensa, dominá pa mal deseo, ta hiba na morto, pero esun dominá pa loke ta di Spiritu Santu ta hiba na bida i pas.

⁷ Esnan ku un moda di pensa dominá pa nan naturalesa pekaminoso, ta enemigu di Dios, pasobra nan no ta someté nan na su lei ni nan no por tampoko.

⁸ P'esei esnan ku ta sigui nan naturalesa pekaminoso no por agradá Dios.

⁹ Sinembargo boso no ta biba mas segun deseo pekaminoso, pero segun Spiritu Santu, ya ku Spiritu di Dios ta biba den boso. Esun ku no tin Spiritu di Kristu, no ta pertenesé na Kristu.

¹⁰ Ma si Kristu ta biba den boso, Spiritu Santu ta bida pa boso, pasobra Dios a aseptá boso komo agradabel den su bista, ounke boso kurpa ta destiná pa muri pa motibu di piká.

¹¹ Awor si Spiritu di Esun ku a lanta Hesus for di morto ta biba den boso, E mes ku a lanta Kristu, tambe lo duna boso kurpa mortal bida pa medio di su Spiritu ku ta biba den boso.

¹² Ke men anto, rumannan, nos tin un obligashon, pero no di biba segun e deseonan di nos naturalesa pekaminoso.

¹³ Pasobra si boso biba segun boso mal deseonan, sigur sigur boso lo muri, pero si, pa medio di Spiritu Santu, boso pone un fin na e práktikanan di maldat, boso lo biba!

¹⁴ Tur hende ku ta laga Spiritu di Dios guia nan ta yu di Dios.

¹⁵ Pasobra e Spiritu ku Dios a duna boso no ta hasi boso katibu pa boso bolbe biba ku miedu. Nò, ta e Spiritu ku ta hasi boso yu adoptá di Dios; ta pa medio di djE nos ta sklama na Dios: ‘Abba, Tata!’

¹⁶ E mesun Spiritu ta konfirmá loke nos spiritu ta testiguá, esta ku nos ta yu di Dios.

¹⁷ I komo nos ta yu, nos lo tin parti tambe den e benefisionan ku Dios a primintí. Nos lo tin parti den nan huntu ku Kristu, basta nos sufri huntu kunÉ pa asina nos por ta huntu kunÉ den su gloria tambe!

E gloria ku mester bini

¹⁸ Mi ta konvensí ku sufrimentu ku nos ta pasa aden awor akí no ta di kompará ku e gloria ku Dios lo mustra nos.

¹⁹ Ku un deseo profundo kreashon tambe ta anhelá e momento ku Dios lo mustra klaramente ken ta su yu,

²⁰ pasobra henter kreashon a pèrdè su meta berdadero. No ta kreashon tabata ke esei, ta Dios mes a disponé asina. Sinembargo kreashon a keda ku speransa:

²¹ e mes lo keda librá di gara di destrukshon. Asin'ei e tambe por tuma parti na e libertat glorioso ku yu di Dios tin.

²² Nos sa ku te ainda henter kreashon ta sufri i keha manera un muhé ku doló di parto.

²³ No ta kreashon so ta keha, pero nos tambe, ounke ya nos tin Spiritu Santu komo promé fruta di e kosecha benidero. Nos mes tambe ta keha intensamente i nos ta anhelá pa Dios adoptá nos komo su yu, pa di e manera ei nos kurpa keda kompletamente librá.

²⁴ Pasobra ta ku e speransa ei nos a haña salbashon. Pero si un hende ta mira loke e ta spera, esei no ta speransa mas. Ken lo keda spera riba loke ya e ta mira su dilanti?

²⁵ Pero si loke nos ta anhelá ta algu ku nos no ta mira ainda, nos ta warda riba dje ku pasenshi!

²⁶ Di e mesun manera Spiritu Santu ta bin yuda nos den nos debilidat, pasobra nos no sa kiko ta e kosnan ku nos mester resa p'e, manera debe ser. Pero Spiritu Santu mes ta intersedé pa nos ku suspiro, ku palabra no por ekspresá.

²⁷ Anto Dios, ku ta skrudiñá kurason di hende, sa kiko Spiritu Santu ta pensa, pasobra Spiritu Santu ta intersedé di akuerdo ku boluntat di Dios pa e pueblo santu di Dios.

²⁸ Nos sa ku tur kos ta kontribuí na bienestar di esnan ku ta stima Dios, esta esnan ku El a yama di akuerdo ku su propósito.

²⁹ Pasobra esnan ku Dios a konosé di antemano, El a destiná kaba pa bira meskos ku su Yu, pa asina su Yu ta e ruman mayó di hopi ruman.

³⁰ Esnan destiná di antemano pa bira meskos ku su Yu, Dios a yama. Esnan ku El a yama, El a aseptá komo agradabel den su bista. I ku esnan aseptá, El a kompartí su gloria.

Amor di Dios

³¹ P'esei kiko mas nos por bisa? Si Dios ta na nos fabor, ken por ta kontra nos?

³² Ni su mes Yu E no a spar, pero a entreg'É na morto pa nos tur. Si El a duna nos su mes Yu, lo E no a duna nos tur otro kos tambe?

³³ Ken lo akusá esnan ku Dios a skohe? Ta Dios mes ta aseptá hende komo hustu.

³⁴ Ken lo riska kondená nan? Niun hende! Kristu-Hesus ta e úniko hende ku no solamente a muri, pero tambe a lanta for di morto pa nan. E ta Esun ku ta sintá na man drechi di Dios i ta intersedé pa nos!

³⁵ Kiko lo por stroba nos di haña e amor ku Kristu tin pa nos? Sufrimentu òf ansha? Persekushon, hamber òf falta di paña? Peliger òf miedu di un morto violento?

³⁶ Manera tin skibí den Skritura: Pa bo kousa nos ta pasa ansha di morto, dia aden dia afó. Nan ta trata nos manera karné ku nan ta bai mata.

³⁷ Pero den tur e kosnan akí nos ta mas ku viktorioso pa medio di Esun ku a stima nos.

³⁸ Pasobra mi tin sigur ku ni morto ni bida, ni angel ni outoridat, ni kos presente ni kos futuro, ni podernan spiritual,

³⁹ ni e lugá di mas altu ni esun di mas profundo, ni niun otro kos ku Dios a krea, no por separá nos nunka di e amor ku Dios a mustra nos den persona di Kristu-Hesus nos Señor.