Romanonan 7 - Papiamentu Bible 2013

Morto so por libra hende di su obligashon pa ku Lei

¹ Rumannan, sigur sigur boso ku konosé Lei di Moises sa ku e Lei ei tin poder riba un hende miéntras e ta na bida.

² Por ehèmpel, un esposa ta mará na su esposo pa Lei tanten e esposo ta na bida, pero si e esposo fayesé, e muhé ei no ta mará mas na e Lei ku tabata uni su esposo kuné.

³ Pues si un muhé uni ku un otro hòmber, tanten su esposo ta na bida, e ta haña nòmber di adúltera. Ma ora su esposo fayesé, e no ta mará mas na e Lei ei i por kasa ku un otro hòmber, sin ku esei ta hasié un adúltera.

⁴ Asina ta sosodé ku boso tambe, mi rumannan. Ta pasobra Kristu a sakrifiká su kurpa, boso ta morto pa loke ta trata Lei di Moises. Awor boso ta pertenesé na un otro, esta, na Esun ku a lanta for di morto pa nos por biba un bida fruktífero pa Dios.

⁵ Pasobra tempu ku nos tabata sigui nos naturalesa pekaminoso, Lei di Moises tabata sirbi pa lanta mal deseo den kada parti di nos kurpa i nos a karga fruta ku tabata hiba na morto.

⁶ Sinembargo awor nos ta morto pa Lei di Moises, e Lei ku tabatin nos prezu. Di e manera ei nos ta liber pa sirbi Dios den e bida nobo di su Spiritu i no segun e reglanan di e Lei bieu.

E problema di piká den hende

⁷ Ta bisa nos ke bisa anto ku Lei di Moises ta pekaminoso? Apsolutamente ku nò! Sinembargo ta Lei a siña mi kiko ta maldat. Por ehèmpel, lo mi no tabata sa kiko ta kudishá kos di otro hende, si no tabatin pará den Lei: ‘No deseá!’

⁸ Pero piká a probechá di e mandamentu ei i a lanta tur sorto di kudishi den mi. Pues si no tabatin Lei, piká lo tabata morto!

⁹ Tabatin un tempu ku ami, sin ku mi tabata kai bou di Lei, tabatin bida, pero ora e mandamentu a bini, piká a lanta kabes den mi bida

¹⁰ i mi a muri. A resultá ku e mandamentu ku mester a duna mi bida, a trese morto pa mi,

¹¹ pasobra piká a probechá di un mandamentu tantu pa engañá mi komo pa mata mi.

¹² Asina ta ku Lei di Moises riba su mes ta santu, i su mandamentunan ta santu, hustu i bon.

¹³ Kiko awor? Ta algu bon tabata mi morto? Apsolutamente ku nò! Al kontrario, piká a usa algu bon pa kousa mi morto i dje manera ei el a laga mira su kara. Asina tambe, pa medio di e mandamentu, a sali na kla kon ekstremadamente pekaminoso piká ta!

¹⁴ Nos sa tòg ku Lei ta spiritual, pero t'ami ta hende di karni i wesu, bendí ku piká manera ta bende katibu.

¹⁵ Mi no ta komprondé mi mes aktonan, pasobra mi no ta hasi loke mi ke, pero ta nèt loke mi tin rabia riba dje mi ta hasi!

¹⁶ Mi no ke hasi e maldat ku mi ta haña mi ta hasi, anto esei ta un prueba ku mi ta rekonosé ku Lei ta bon.

¹⁷ Ke men ku no ta ami mes ta hasi maldat mas, sino e piká ku ta biba den mi.

¹⁸ Pasobra mi sa ku no tin nada bon den mi, ku ta hende di karni i wesu; ounke mi tin deseo di hasi loke ta bon, mi no ta hasié tòg.

¹⁹ Sí, mi no ta hasi e bon ku mi ke hasi, sino e maldat ku mi no ke hasi.

²⁰ Ke men, si mi no hasi e bon ku mi mes ke hasi, ta pasobra no t'ami ta aktua, sino e piká ku ta biba den mi.

²¹ Mi ta deskubrí pues e prinsipio akí: ounke mi ke hasi loke ta bon, ta maldat so mi ta haña mi ta hasi.

²² Den mi paden mi ta gusta Lei di Dios,

²³ pero di otro banda mi ta mira un otro lei den henter mi kurpa, ku ta kontra di Lei di Dios ku mi ke sigui ku mi mente. E otro lei ei ta e lei di piká den mi, ku tin mi kompletamente den su gara.

²⁴ Esta un hende mizerabel mi ta! Ken lo libra mi di e poder di morto ku ta obra den mi kurpa?

²⁵ Dios so por libra mi i p'esei mi ta gradisiÉ pa medio di Señor Hesu-Kristu! Pa konkluí, t'esaki ta mi situashon: di un banda mi ta sirbi Lei di Dios ku mi mente, di e otro banda, ku mi naturalesa pekaminoso mi ta sirbi e lei di piká den mi.