Romanonan 2 - Papiamentu Bible 2013

Dios ta husga tur hende konforme bèrdat

¹ P'esei mes, mi amigu, — no ta importá ken abo ku ta husga tur otro hende ta — abo mes no tin diskulpa. Pasobra ora bo ta husga otro hende, ta bo mes bo ta kondená! Ya ku bo ta hasi nèt e kosnan ku bo ta husga otro hende p'e.

² Nos sa ku Dios ku rason ta husga hende ku ta hasi e tipo di kos akí.

³ Pero abo, mi amigu, ta hasi e mes kosnan ku bo ta kondená! Akaso bo ta kere ku bo por skapa di huisio di Dios?

⁴ Òf ta menospresiá bo ta menospresiá bondat, toleransia i pasenshi abundante di Dios? Ta sa bo no sa ku Dios ta bondadoso i p'esei E ke trese un kambio den bo bida?

⁵ Pero bo kurason ta duru, bo ta tèrko. P'esei bo ta kumpra kastigu pa bo kurpa ku lo bo haña riba dia di kastigu, ora Dios aparesé pa dikta sentensia hustu!

⁶ Lo E paga kada hende segun su aktonan.

⁷ Esnan ku ta sigui perseverá den loke ta bon i ta buska gloria, honor i bida ku no ta kaba nunka, Dios lo duna bida eterno.

⁸ Otro hende ta egoista, ta rechasá bèrdat i ta sigui loke ta robes. Riba nan Dios lo baha su rabia i furia.

⁹ Tur hende ku ta praktiká maldat lo sufri i pasa angustia, esnan ku ta hudiu na promé lugá i esnan no hudiu tambe.

¹⁰ Pero tur hende ku hasi bon lo haña gloria, honor i pas, esnan ku ta hudiu na promé lugá i esnan no hudiu tambe.

¹¹ Pasobra Dios no ta hasi distinshon di persona.

¹² Esnan ku no tin Lei di Moises ta peka i bai pèrdí sin Lei, ma e hudiunan ku sí tin Lei di Moises, ora nan peka, ta keda kondená pa medio di Lei.

¹³ Dios no ta aseptá hende komo hustu djis pasobra e ta skucha Lei di Moises, sino pasobra e ta kumpli ku e Lei.

¹⁴ Esnan no hudiu, ku no tin Lei di Moises, pero ku di nan mes ta hasi loke e Lei ei manda, ta bira nan mes lei!

¹⁵ Nan kondukta ta mustra ku e Lei ta skibí den nan kurason. Nan konsenshi tambe ta komprobá esei i nan pensamentu tin be ta akusá nan i otro be ta defendé nan.

¹⁶ Esaki lo sosodé riba e dia ku Dios ta husga e sekretonan di hende su kurason, pa medio di Kristu-Hesus i di akuerdo ku e bon notisia ku mi ta prediká.

E hudiunan i Lei di Moises

¹⁷ Pero abo ta yama bo mes hudiu, bo ta konfia riba Lei di Moises i ta orguyoso di bo Dios.

¹⁸ Bo a siña kiko boluntat di Dios ta i bo por diserní bon for di malu, pasobra bo a haña instrukshon den Lei di Moises.

¹⁹ Bo ta sigur ku bo por guia hende siegu i ku bo ta lus den kaminda di esun den skuridat,

²⁰ edukadó di esun ku ta ignorante i maestro di hende simpel, pasobra den lei bo ta haña formulashon perfekto di konosementu i bèrdat.

²¹ Bon antó, si bo ta siña otro, di kon bo no ta instruí bo mes? Bo ta prediká pa no hòrta, anto bo mes ta hòrta?

²² Bo ta bisa pa no kometé adulterio, anto bo mes ta kometé adulterio? Idolatria ta repugná bo, anto tòg bo ta enrikesé bo mes ku kos hòrtá for di tèmpel pagano?

²³ Abo ta broma ku Lei di Moises, pero bo ta kibra lei i asina bo ta rebahá Dios.

²⁴ Ku rason tin skibí: ‘Ta boso falta ku e paganonan ta blasfemá nòmber di Dios!’

²⁵ Ta bèrdat ku sirkunsishon tin balor pa esun ku ta kumpli ku Lei di Moises, pero si bo no ta kumpli kuné, ta komo si fuera bo no ta sirkunsidá!

²⁶ Meskos tambe lo konsiderá esun ku no ta sirkunsidá, pero ta tene su mes na e reglanan di Lei di Moises, komo sirkunsidá!

²⁷ Esun ku físikamente no ta sirkunsidá, pero tòg ta tene su mes na Lei, lo husga abo ku ta kibra Lei, ounke bo tin Lei i ta sirkunsidá.

²⁸ Pasobra no ta kos eksterno ta determiná ken ta hudiu berdadero, ni sirkunsishon no ta solamente loke ta hasi na kurpa di un hende.

²⁹ Ma hudiu di bèrdè ta esun ku ta hudiu di paden, esta esun ku tin su kurason sirkunsidá. Anto e sirkunsishon ei ta trabou di Spiritu Santu, no di loke ta skibí! Hende asina ta haña elogio, no di hende, sino di Dios!