Romanonan 15 - Papiamentu Bible 2013

Kristu komo ehèmpel

¹ Nos ku ta fuerte den fe mester yuda esnan ku ta débil ku nan debilidat i no buska nos mes probecho.

² Laga kada un di nos tene kuenta ku bienestar di su ruman i yud'é krese den fe.

³ Pasobra Mesias tampoko no a buska pa agradá su mes. Al kontrario manera Skritura ta bisa: ‘E ofensanan di esnan ku a insultá Bo, ta riba mi kabes nan a kai.’

⁴ Sí, tur kos ku tabata skibí anteriormente den Skritura t'ei pa duna nos instrukshon, di manera ku e perseveransia i ánimo ku nos ta haña di dje ta yena nos ku speransa.

⁵ Dios, ku ta duna perseveransia i ánimo, laga ku boso por biba den union ku otro, di akuerdo ku boluntat di Kristu-Hesus.

⁶ Anto e ora ei boso lo alabá Dios i Tata di nos Señor Hesu-Kristu riba un solo boka.

E bon notisia ta pa tantu hudiu komo no hudiu

⁷ P'esei antó aseptá otro pa gloria di Dios, manera Hesus a aseptá boso.

⁸ Pasobra esaki mi ta deklará na boso: Kristu a bin sirbi esnan ku ta hudiu pa mustra ku Dios ta tene su mes na su palabra i pa kumpli ku e promesanan ku El a hasi nos antepasadonan.

⁹ Tambe Kristu a bini pa esnan ku no ta hudiu alabá Dios pa su mizerikòrdia, manera Skritura ta bisa: ‘P'esei, mi ta alabá Bo, den tur e nashonnan, mi ta kanta salmo na honor di bo Nòmber.’

¹⁰ Den otro parti tambe Skritura ta bisa: ‘Nashonnan, legra huntu ku pueblo di Dios.’

¹¹ I den otro parti: ‘Alabá Señor tur nashon, tur pueblo kanta su gloria.’

¹² Isaías tambe ta bisa: ‘Lo bini un desendiente di Ishai, ku lo lanta pa goberná e pueblonan no hudiu i nan lo pone nan speransa den djE.’

¹³ Dios, ku ta nos fuente di speransa, yena boso ku goso i pas pa motibu di boso fe, ya asina boso speransa por bona pa medio di poder di Spiritu Santu.

Pablo komo misionero

¹⁴ Mi rumannan, ami ta konvensí di bèrdè mes ku boso ta yen di bondat, ta poseé tur konosementu i ta kapas pa instruí otro.

¹⁵ Pero komo persona ku a risibí grasia di Dios, mi a tribi skibi boso sierto kos tòg den e karta, pa boso no lubidá.

¹⁶ Dios a destiná mi pa sirbi Kristu-Hesus serka e no hudiunan. E sirbishi saserdotal ku mi ta duna ta enserá proklamashon di e bon notisia di Dios, ku e meta pa presentá esnan no hudiu komo un ofrenda agradabel na Dios, santifiká pa Spiritu Santu.

¹⁷ Ke men anto ku den Kristu-Hesus mi por ta orguyoso di mi sirbishi na Dios.

¹⁸ Pasobra mi no ta tribi papia nada ku no ta loke Kristu a hasi pa medio di mi, pa pone esnan no hudiu obedesé Dios. Anto pa hasi esei Kristu a hasi uso di palabra, echo,

¹⁹ señal, milager i poder di Spiritu Santu. Asina ta ku mi a kompletá mi tarea di prediká e bon notisia tokante Kristu, di Herusalèm i bisindario, te na region di Iliria.

²⁰ I semper mi a aspirá pa anunsiá e bon notisia kaminda Kristu su nòmber no ta konosí ainda. Pasobra nunka mi no tabata ke traha riba fundeshi ku otro hende a pone,

²¹ sino mas bien manera tin den Skritura: ‘Pasobra nan lo mira loke nunka no a konta nan di dje, nan lo komprondé loke nunka ántes nan no a tende.’

Pablo ta plania pa bishitá Roma

²² Anto ta e tarea akí mes a stroba mi diferente bia di bishitá boso.

²³ Pero awor mi trabou na e lugánan akí a kaba i komo fo'i basta aña mi tin gana di bishitá boso,

²⁴ mi ta spera di pasa eibanda, durante mi biahe pa Spaña. I despues di tin e plaser di mira boso pa algun tempu, mi ta spera ku boso por kontribuí pa mi kontinuá mi biahe.

²⁵ Pero awor mi ta bai Herusalèm pa hiba un yudansa pa e rumannan aya.

²⁶ Pasobra e rumannan di Masedonia i Akaya a disidí di duna un kontribushon na e pobernan di e pueblo santu di Dios na Herusalèm.

²⁷ Nan a hasié boluntariamente, ounke en realidat ta nan obligashon. Pasobra meskos ku e no hudiunan a haña un parti di e bendishonnan spiritual di e hudiunan, esnan no hudiu mester kompartí loke nan ta poseé ku esnan hudiu.

²⁸ Ora mi kaba di entregá e suma di kontribushon den propio man di e kreyentenan na Herusalèm i na kaminda pa Spaña, lo mi pasa serka boso.

²⁹ I mi sa ku ora mi yega serka boso, mi ta yega ku bendishon di Kristu na abundansia.

³⁰ Rumannan, mi ta hasi un apelashon na boso pa medio di nos Señor Hesu-Kristu i pa medio di e amor ku Spiritu Santu ta duna: pidi Dios pa mi i kompañá mi asina den lucha.

³¹ Pidi pa mi por skapa di e hudiunan inkreyente na Hudea i pa e kontribushon ku mi ta hiba Herusalèm por keda bon risibí serka e rumannan aya.

³² E ora ei, ku Dios ke, mi por bini serka boso ku goso i pasa pa relahá un tempu.

³³ Dios, ku ta fuente di pas, sea ku boso tur. Amèn.