Romanonan 12 - Papiamentu Bible 2013

Bida nobo den union ku Kristu

¹ P'esei antó, rumannan, ya ku Dios ta mizerikordioso, mi ta roga boso pa ofresé boso mes komo sakrifisio bibu, santu i agradabel n'E. Esei ta e manera apropiá pa sirbi Dios.

² I no laga e manera di pensa di e mundu akí forma boso, al kontrario, laga Dios transformá boso i duna boso un manera nobo di pensa. E ora ei boso lo konstatá kiko E ke di boso, esta loke ta bon, agradabel i perfekto.

³ Dios a duna mi un enkargo, p'esei mi por bisa kada un di boso: no pensa ku boso ta mas di loke boso ta, pero sea realístiko. Kada ken mester tin un konsepto humilde di su mes, di akuerdo ku e midí di fe ku Dios a dun'é.

⁴ Pasobra meskos ku un kurpa tin hopi parti, anto no ta tur e partinan ei tin e mesun funshon,

⁵ asina tambe, ounke nos ta hopi, nos ta forma ún kurpa pa medio di nos union ku Kristu i nos ta uní ku otro meskos ku e partinan di un solo kurpa.

⁶ Dios a duna nos diferente don di akuerdo ku e grasia ku nos a risibí di djE. Si Dios a duna un hende don pa profetisá, e profetisá di akuerdo ku e fe ku e tin;

⁷ si ta don pa sirbi, e sirbi; si ta don pa duna siñansa, e duna siñansa;

⁸ si ta don pa kurashá, e kurashá; si ta don pa duna, e duna ku generosidat; si ta don pa guia, e guia ku zelo; si ta don pa mustra mizerikòrdia, e hasié ku legria.

Deber di bida kristian

⁹ Stima otro sinseramente. Odia maldat i pega boso kurason na loke ta bon.

¹⁰ Stima otro di kurason, ku amor di ruman i sea esun promé pa respetá otro.

¹¹ Traha ku zelo i no hasi kos di floho; sirbi Señor ku un kurason ferviente.

¹² Laga e speransa ku boso tin hasi boso kontentu; perseverá den tempu di tribulashon; resa konstantemente.

¹³ Kontribuí pa kubri nesesidat di e pueblo santu i praktiká hospitalidat.

¹⁴ Bendishoná esnan ku ta persiguí boso; bendishoná nan, no maldishoná nan.

¹⁵ Sea kontentu ku esnan ku ta kontentu; yora ku esnan ku ta yora.

¹⁶ Biba den harmonia ku otro. No sea orguyoso, pero hasi trabou humilde. No sea arogante.

¹⁷ No paga malu ku malu. Hasi loke ta bon abiertamente.

¹⁸ Biba na pas ku tur hende te kaminda esei ta dependé di boso.

¹⁹ Keridonan, no tuma vengansa boso mes, pero laga Dios kastigá. Pasobra tin skibí ku Señor ta bisa: ‘Ami lo tuma vengansa; Ami lo paga bèk.’

²⁰ Pero tambe E ta bisa: ‘Si bo enemigu tin hamber, dun'é di kome; si e tin set, dun'é di bebe. Pasobra bo ta pone su kara kai di bèrgwensa.’

²¹ No laga maldat vense boso, pero vense maldat ku loke ta bon!