Revelashon 7 - Papiamentu Bible 2013

E 144.000 sirbidónan di Dios na mundu

¹ Despues mi a mira na e kuater skinanan di mundu kuater angel pará, ku tabata dominá e kuater bientunan di mundu, di manera ku bientu lo no a supla riba tera òf laman òf dor di kualke palu.

² Mi a mira un otro angel subi for di ost ku e seyo di e Dios bibu. El a grita duru bisa e angelnan ku a haña poder pa hasi daño na tera i laman:

³ ‘No hasi daño na tera, laman i e palunan, promé ku nos pone e seyo riba frenta di e sirbidónan di nos Dios.’

⁴ I mi a tende ku e kantidat di esnan ku a haña e seyo tabata 144.000 i ku nan tabata bini for di tur tribu di pueblo di Israel:

⁵ 12.000 for di tribu di Huda, 12.000 for di tribu di Ruben, 12.000 for di tribu di Gad,

⁶ 12.000 for di tribu di Asher, 12.000 for di tribu di Naftali, 12.000 for di tribu di Manase,

⁷ 12.000 for di tribu di Simeon, 12.000 for di tribu di Levi, 12.000 for di tribu di Isakar,

⁸ 12.000 for di tribu di Zebulon, 12.000 for di tribu di Jozef i 12.000 for di tribu di Benhamin, ku a haña e seyo.

E multitut grandi den shelu

⁹ Despues mi a mira un multitut grandi; ningun hende no por a konta nan. Nan tabata di tur rasa, tribu, pueblo i idioma i a pone nan para dilanti di e trono i dilanti di e Lamchi, bistí na paña blanku i ku rama di palma den nan man.

¹⁰ Nan a grita duru: ‘Salbashon ta bini di nos Dios ku ta sintá riba e trono, i di e Lamchi.’

¹¹ Tur angel tabata pará rondó di e trono, rondó di e ansianonan i di e kuater sernan; nan a kai na rudia dilanti di e trono adorá Dios

¹² bisando: ‘Amèn! Alabansa, gloria i sabiduria, danki i honor, poder i forsa ta pertenesé na Dios te den tur eternidat! Amèn!’

¹³ E ora ei un di e ansianonan a puntra mi: ‘E hendenan bistí na blanku, ken nan ta, i di unda nan ta bini?’

¹⁴ ‘Ami no sa, mi shon,’ mi a kontestá, ‘pero abo sa.’ El a bisa: ‘Esakinan ta esnan ku a pasa den opreshon grandi. Nan a laba nan pañanan i a hasi nan blanku dor di purifiká nan ku sanger di e Lamchi.

¹⁵ P'esei nan ta para dilanti di trono di Dios i ta sirbiÉ di dia i anochi den su tèmpel. Esun ku ta sintá riba e trono, lo biba serka nan i protegé nan.

¹⁶ Nunka mas nan lo no sufri ni hamber ni set, solo lo no kima nan, kalor lo no tormentá nan,

¹⁷ pasobra e Lamchi meimei dilanti di e trono lo ta nan wardadó, i E lo hiba nan na fuente di e awa ku ta duna bida; i Dios mes lo seka tur lágrima na nan wowo.’