Revelashon 20 - Papiamentu Bible 2013

E mil añanan

¹ E ora ei mi a mira un angel baha for di shelu ku e yabi di abismo i un kadena grandi den su man.

² El a kohe e dragon, e kolebra bieu, es desir diabel òf Satanas, tene, i a mar'é pa mil aña ku kadena.

³ El a bent'é den abismo, sera e abismo i pone un seyo ariba, di manera ku e dragon no por a hinka e nashonnan mas den tentashon, promé ku e mil añanan pasa. Despues mester lag'é lòs pa poko tempu.

⁴ E ora ei mi a mira trono i alma di e hendenan di kende a kita nan kabes afó, pasobra nan a tene na testimonio di Hesus i na palabra di Dios. Nan a bai sinta riba trono i a haña outorisashon pa aktua komo hues. Esaki ta esnan ku no a adorá ni e bestia ni su imágen i ku no a haña e marka ni riba nan frenta ni riba nan man. Nan a bolbe biba i a goberná mil aña komo rei huntu ku Kristu.

⁵ Esaki ta e promé resurekshon. E otro mortonan no a biba atrobe promé ku e mil añanan a pasa.

⁶ Felis esnan ku ta pertenesé na Dios i ku tin parti den e promé resurekshon. E di dos morto no tin poder riba nan, pero nan lo ta saserdote di Dios i di Kristu i nan lo goberná komo rei mil aña kunÉ.

E viktoria riba Satanas

⁷ Dia e mil añanan pasa, lo laga Satanas sali for di su prizòn.

⁸ Lo e sali bai pa gaña e nashonnan ku ta biba na e kuater skinanan di mundu, esta Gog i Magog, i pa reuní nan pa guera. Nan ta mes numeroso ku e pipitanan di santu kantu di laman.

⁹ Nan ta ranka sali den tur e hanchura di pais i sitia kampamentu di esnan ku ta pertenesé na Dios, e siudat ku E ta stima. Pero kandela lo baha for di shelu kima nan kaba ku nan.

¹⁰ Lo benta diabel, ku a gaña nan, den e lago di kandela i suafel, kaminda e bestia i e profeta falsu tambe ta. Lo torturá nan di dia i anochi, te den tur eternidat.

Huisio

¹¹ E ora ei mi a mira un trono grandi koló blanku i Esun ku tabata sintá riba dje. Tera i shelu a hui p'E i no a bolbe mira nan mas.

¹² Mi a mira e mortonan, grandi i chikitu, pará dilanti di e trono. A habri e bukinan. A habri un otro buki mas, e buki di bida. A husga e mortonan segun nan echonan, manera nan tabata deskribí den e bukinan.

¹³ Laman a duna e mortonan ku tabata den dje bèk, i morto i reino di morto a duna nan mortonan bèk, i a husga nan, kada un segun su echonan.

¹⁴ E ora ei a benta morto i reino di morto den e lago di kandela. E lago di kandela ei ta e di dos morto.

¹⁵ A benta tur esnan ku nan nòmber no tabata den e buki di bida, den e lago di kandela.