Proverbionan 6 - Papiamentu Bible 2013

¹ Mi yu, si bo a primintí un otro persona di para bòrg, si bo a para bòrg pa un hende ku bo no konosé bon.

² Si bo a bira víktima di bo mes palabranan, prizonero di loke bo mes a primintí.

³ Ta den man di otro hende bo a kai! Hasi lo siguiente, mi yu: Pura bai serka e persona ei i keda rog'é p'e apsolbé bo di bo obligashonnan.

⁴ No bai soño lubidá, no duna bo mes ni un ratu di sosiegu.

⁵ Hui bai manera un gasela ku a logra skapa, manera un para ku a hui sali for di su kui.

⁶ Floho ku bo ta, bai serka e vruminga, wak kon e ta hasi i siña bo lès.

⁷ Un vruminga no tin lider, e n' tin shon, e n' tin maestro;

⁸ tòg e no ta laga tempu di kosecha pasa, ta for di den zomer e ta buska i warda su provishon.

⁹ Floho, kuantu tempu mas bo ta keda drumi pòrnada, ki dia bo ta disidí di lanta ariba?

¹⁰ Ai, mi ke drumi djis un ratu mas, laga mi kabishá, drumi un ratu mas ku brasa krusá.

¹¹ Pero pobresa lo ataká bo manera un atrakadó, nesesidat lo asaltá bo manera un ladron armá.

¹² Mal hende, ku no ta sirbi pa nada, ta hende ku ta kana papia kos ku no ta kuadra ku bèrdat,

¹³ ku ta bira wowo mustra ku boka, ku ta stot ku pia i mustra ku dede;

¹⁴ ku tin mente perverso, ku semper ta pensa maldat pa hasi i asina ta sembra desunion kontinuamente.

¹⁵ P'esei di un dia pa otro lo e kosechá desaster, hañ'é diripiente ruiná, sin chèns di rekuperá.

¹⁶ E seis kosnan akí SEÑOR ta odia, sí, E ta repudiá e shete kosnan akí.

¹⁷ Kara orguyoso, lenga mentiroso, man ku ta mata hende inosente,

¹⁸ kurason ku ta plania kos malu, pia ku ta pura pa bai hasi maldat,

¹⁹ testigu falsu ku no tin mester di pensa pa gaña i hende ku kontinuamente ta sembra desunion entre ruman.

²⁰ Mi yu, keda kòrda loke bo tata ta bisa bo, no lubidá loke bo mama ta siña bo.

²¹ Warda nan pa semper den bo kurason; bisti nan na bo garganta.

²² Pasobra siñansa di bo mayornan lo guia bo unda ku bo bai, protegé bo kaminda bo kai drumi, papia ku bo ora ku bo spièrta.

²³ Pasobra e mandamentunan akí ta un lampi, e siñansa un lus, i e guia ku korekshon ta duna ta e manera di siña bo biba,

²⁴ pa tene bo for di muhé di bida, for di trasteria di e muhé ku no ta bo kasá.

²⁵ No pèrmití su beyesa lanta bo pashon, no kai pa su mirada.

²⁶ E muhé di bida ta bal un pan so, pero e muhé kasá ta kosta bo bo bida.

²⁷ Por pone kandela den bo kamisa antó e no ta kima bo paña?

²⁸ Bo por kana riba karbon kayente antó e no ta kima bo pia?

²⁹ Meskos asina bo no por drumi ku kasá di otro hende, drenta kuné, sin sufri konsekuensia di loke bo ta hasi.

³⁰ No ta despresiá e ladron ku ta hòrta pa plakia su hamber.

³¹ Tòg ora arest'é, ta lag'é paga shete bia mas tantu, e tin ku entregá tur loke e tin den kas.

³² Pero esun ku kometé adulterio, no ta usa su sintí, un hende asina ta kaba ku su mes.

³³ Lo e keda ihùrt i deshonrá; nada lo no por kita e bèrgwensa ei.

³⁴ Yalurs por pone esposo di e señora ei bira razu, venga sin tene mizerikòrdia.

³⁵ E no ta aseptá niun sorto di daño i perhuisio ni niun regalo lo no por kalm'é.