Proverbionan 5 - Papiamentu Bible 2013

¹ Mi yu, paga atenshon na mi sabiduria i habri orea pa mi komprenshon,

² pa bo por skohe bon kaminda i por papia ku konosementu.

³ Pasobra e muhé ku ta biba un bida parotin tin mashá labio, palabra yen di trastu.

⁴ Pero ora bo tuma aden kuné, e ta marga manera sentebibu, skèrpi manera un nabaha.

⁵ E ta hasi bo dianan kòrtiku, yuda bo baha pa sawaka.

⁶ E ke tene bo for di kaminda di bida, p'esei e ta pone bo dualu bai kaminda robes, sin ku bo ripará.

⁷ P'esei, mi yunan, tende di mi, no rechasá mi palabranan.

⁸ Keda leu for di e muhé ku ta biba un bida parotin, no aserká porta di su kas.

⁹ Pa bo no pèrdè bo dignidat i tira bo bida afó, pa motibu di un muhé sin kompashon.

¹⁰ Pa strañero no gosa di bo rikesa, i pa loke bo a logra ku tur bo forsa no resultá den kas di deskonosí.

¹¹ E ora ei na final, ora bo pèrdè bo dignidat, lo bo grita desesperadamente:

¹² ‘Kon mi por a lubidá tur loke a siña mi? Kon mi por a pone tur e atvertensianan ei un banda?

¹³ Mira kon mi a keda sin tende di mi maestronan! Mira kon mi a sera orea pa nan palabranan!

¹⁴ E pueblo reuní por a mira ku mi a hera di bai pèrdí.’

¹⁵ Bebe awa for di bo mes baki di awa, awa ku ta kore for di bo mes pos.

¹⁶ Lo bo ke pa bo awa yena basha afó i bo roinan yena kayanan?

¹⁷ E pos i awa ta di bo so, di ningun otro hende mas. No kompartí nan ku hende straño.

¹⁸ Bendishoná sea bo pos! Laga bo kasá satisfasé bo,

¹⁹ un biná lif, un gasela enkantador; laga su pechunan satisfasé bo semper, keda enkantá konstantemente pa su karisia.

²⁰ Pakiko laga un muhé di bida enkantá bo antó? Pakiko bras'é primié den bo kurpa?

²¹ Nada no ta keda skondí pa SEÑOR. Tur loke hende hasi E ta pone den balansa.

²² Esun ku no tin Dios ta kai den trampa di su mes maldatnan, keda pegá den laso di su mes piká.

²³ Lo e muri pasobra e no ta gusta korekshon, su bobedat ta pon'é kai den pèrdishon.