Proverbionan 31 - Papiamentu Bible 2013

¹ Palabranan di Rei Lemuel. Palabranan di Dios, ku kual su mama a koregié:

² Skucha, mi yu, fruta di mi entraña, kontesta di Dios riba mi rogamentunan.

³ No gasta sèn ni energia ku muhé. Muhénan a pone hopi rei bai pèrdí.

⁴ Tampoko n' ta pas pa un rei entregá su mes na bibida stèrki, Lemuel. Un lider no mester bebe fuma.

⁵ Pa bo no bebe, lubidá loke lei ta bisa i kita derecho di tur esnan ku ta oprimí.

⁶ Duna bibida i biña na esnan ku ta serka di muri, na esnan ku ta tristu.

⁷ E ora ei e por lubidá su pobresa i su wòrinan un ratu, un ratu e n' tin mester di pensa riba nan.

⁸ Lanta bo bos pa esnan ku no tin bos; defendé esnan sin defensa!

⁹ Habri boka i husga honestamente; defendé derecho di hende pober i di esnan den nesesidat.

Un bon esposa

¹⁰ Un bon esposa no ta fásil pa haña. E bal mas ku piedra presioso.

¹¹ Su esposo tin pleno konfiansa den dje, i lo pasa bon serka dje.

¹² Henter su bida e ta hasi loke ta kumbiní su esposo, no loke no ta kumbinié.

¹³ E ta perkurá p'e tin lana i material pa traha lenen. I ta hasi su trabou ku plaser.

¹⁴ Meskos ku un barku ta bai buska merkansia na paisnan leu, asina e ta sali bai buska kuminda.

¹⁵ E ta lanta mardugá pa duna su famia di kome i pa duna su kriánan e parti ku ta toka nan.

¹⁶ Si e mira un pida tereno ku ta kumbinié e ta kumpr'é i ku su mes sèn e ta planta un kunuku di wendrùif.

¹⁷ E ta faha su kurpa i ku ánimo e ta kuminsá traha.

¹⁸ E ta ripará ku su negoshi ta floresé: su lamp'i kas ta keda sendé te lat.

¹⁹ Su mannan nunka no ta sosegá, semper e ta trahando hilu òf tela.

²⁰ E ta kla pa yuda pobernan i dispuesto pa duna esnan den nesesidat un man.

²¹ Den temp'i friu e n' tin miedu, pasobra e sa ku su famia ta protegé ku pañ'i friu.

²² E mes ta traha tapeit i ta bisti paña karu.

²³ Su kasá ta respetá den pueblo, i ta reuní ku esnan di mas edat na entrada di siudat.

²⁴ E ta traha paña di lenen i faha bòrdá i bende nan ku komersiantenan.

²⁵ E ta bisti karu i elegante, e n' ta preokupá pa dia di mañan.

²⁶ E ta papia ku sabiduria i duna su instrukshonnan na un manera amabel.

²⁷ E ta wak pa tur kos bai bon den su kas i nunka e n' ta sinta pòrnada.

²⁸ Su yunan i su kasá ta gab'é. Nan ta bisa:

²⁹ ‘Tin hopi mama bon, pero niun no por igualá bo.’

³⁰ Aparensia ta gaña hende, i beyesa ta pa un tempu, pero felis e muhé ku ta teme Dios.

³¹ Henter pueblo ta dun'é honor pa tur loke el a hasi.