Proverbionan 3 - Papiamentu Bible 2013

¹ Mi yu, no lubidá loke mi ta siña bo, atené bo na mi mandamentunan.

² E ora ei lo bo tin un bida dushi, un bida largu i felis.

³ Sòru pa semper bo ta fiel i ta papia bèrdat; bisti fieldat i bèrdat manera un kadena na bo garganta, graba nan den bo mente.

⁴ E ora ei lo bo ta bon mirá tantu serka Dios komo serka hende.

⁵ Konfia den SEÑOR ku henter bo kurason i no sea tèrko.

⁶ Tene kuenta kunÉ den tur loke bo hasi i lo E mustra bo e kaminda korekto.

⁷ Stòp ku terkedat, respetá SEÑOR i bira lomba pa maldat.

⁸ Esei ta un remedi ku ta laga bo keda salú, algu ku ta refreská bo kurpa.

⁹ Honra SEÑOR ku ofrendanan for di tur loke bo ta poseé, dun'É e mihó parti di bo kosecha.

¹⁰ E ora ei bo mangasinanan lo yena kankan i bo bakinan di fangu biña lo yena te basha afó.

¹¹ No despresiá korekshon ku bini di SEÑOR, i no disgustá ora E kastigá bo.

¹² Pasobra SEÑOR ta koregí esun ku E ta stima, meskos ku un tata ta koregí su yu stimá.

¹³ Felis esun ku haña sabiduria i optené inteligensia.

¹⁴ Pasobra sabiduria ta mas benefisioso ku plata i ta hasi bo mas riku ku oro por hasi bo.

¹⁵ E tin mas balor ku piedra presioso; maske kiko hende antohá, kompará ku sabiduria e ta ñaña.

¹⁶ Ku man drechi e ta ofresé bida largu, ku man robes rikesa i honor.

¹⁷ Ta mashá agradabel pa sigui sabiduria su pasonan; bo ta biba na pas ora bo kana riba su bereanan.

¹⁸ Pa esnan ku koh'é tene duru e ta un palu ku ta duna bida, felis esun ku dal tene sabiduria duru sin ke lag'é bai.

¹⁹ Pasobra ku sabiduria SEÑOR a konstruí mundu, ku inteligensia El a traha shelu.

²⁰ Dor di su konosementu El a krea laman i ta laga serena choria for di nubia.

²¹ Mi yu, warda sano huisio i diskreshon. No pèrdè nan fo'i bista.

²² Nan lo ta pa bo manera un fuente di bida i drecha bo karakter manera un kadena ta drecha bo aparensia.

²³ E ora ei bo por sigui bo kaminda trankil, e ora ei lo bo no trompeká.

²⁴ Ora bo kai drumi, sustu lo no lanta bo, lo bo drumi trankil.

²⁵ No tene miedu di desaster repentino òf di ruina ku ta sorprendé mal hende.

²⁶ Pasobra SEÑOR lo yuda bo, E ta protegé bo, warda bo di pèrdishon.

²⁷ Ora ta dependé di bo, no retené kos bon for di esnan ku meres'é.

²⁸ No bisa: ‘Ai, bini bèk mañan, e ora ei mi ta duna bo e’, siendo bo tin e.

²⁹ No plania maldat kontra bo próhimo, siendo e ta biba band'i bo sin ta sospechá nada.

³⁰ No buska pleitu sin motibu ku hende ku no a hasi bo nada malu.

³¹ No envidiá mal hende i sigur no sigui nan ehèmpel.

³² Pasobra SEÑOR ta repudiá esnan ku no ke tin di aber kunÉ, pero ku esnan ku ta tende di djE E ta anda ku konfiansa.

³³ SEÑOR ta maldishoná kas di mal hende, pero ta bendishoná hogar di hende hustu.

³⁴ E ta hasi chèrchè di chèrchadónan orguyoso, pero humildenan E ta duna su grasia.

³⁵ Hende sabí ta heredá honor, pero hende bobo E ta pone pasa bèrgwensa.