Proverbionan 25 - Papiamentu Bible 2013

¹ Esakinan tambe ta dichonan di Salomon, ku hendenan den servisio di rei Ezekías, rei di Huda, a kopia.

² Nos ta keda boka habrí ora nos mira kon Dios sa di skonde su kamindanan. Nos ta keda babuká ora nos mira kon rei sa di trese kosnan importante na klaridat.

³ Altura di shelu, profundidat di tera i pensamentu di rei, no ta kosnan ku hende por penetrá drenta.

⁴ Kita skuma fo'i dje plata, e ora ei e platé por traha un vas mashá bunita.

⁵ Kita mal konsehero for di den bisindario di rei, e ora ei e ta goberná hustu i su trono ta keda firme.

⁶ Sá bo lugá den presensia di rei, no tuma lugá di un dignatario.

⁷ Ta mihó rei bisa bo: ‘Subi bini akí’, ku e humiliá bo den presensia di e dignatario ku bo a mira einan.

⁸ No kore hiba loke bo mira dilant'i hues, pasobra otro testigu por desmentí i a lo largu bo n' sa kiko hasi.

⁹ Regla un asuntu ku e persona envolví, pero no usa komo prueba loke un otro hende a konfia bo.

¹⁰ Pasobra ora sali na kla ku bo n' por warda un sekreto, bo a daña bo mes nòmber i lo bo keda ku bèrgwensa.

¹¹ Un bon palabra na e momento eksakto, ta un apel di oro den un skalchi di plata.

¹² Un skual huisioso i orea ku ta skucha; esun t'un renchi, e otro un kadena di e oro mas puru.

¹³ Manera un refresko riba un dia 'i kosecha ku hopi solo, un bon mensahero ta pa su doñ'i trabou, e ta dun'é mas ánimo.

¹⁴ Hende ku ta primintí i no ta kumpli ta manera nubia i bientu ku tòg n' ta trese áwaseru.

¹⁵ Pasenshi ta kalma rabia, palabra suave ta kibra resistensia.

¹⁶ Si bo a topa algu di kome ku ta dushi, no kome di mas, p'e no repugná bo pone bo arohá.

¹⁷ Si bo sa bishitá un konosí, no bai di mas, p'e no fada ku bo i kuminsá odia bo.

¹⁸ Lanta falsu testimonio ta mes mortal ku un chikoti, un spada i un hacha skèrpi.

¹⁹ Es ku den tempu di apuro pone su konfiansa den hende inkonfiabel, ta manera hende ku ke kome ku un djente kibrá òf ku ke kana ku un pia isuek.

²⁰ Si bo kana yega yen di alegria serka un hende tristu, ta komo si fuera bo ta kita su paña riba un dia ku ta hasi friu, si fuera bo ta basha binager den un líkido ku ta kontené soda.

²¹ Si bo enemigu tin hamber, dun'é di kome, i si e tin set, dun'é di bebe;

²² asina bo ta pone su kara kai di bèrgwensa i SEÑOR lo paga bo.

²³ Bientu fo'i nort ta trese áwaseru, mala lenga, kara rabiá.

²⁴ Mihó biba na punta di un dak, ku den henter un kas, ku un muhé ku ta buska kestion.

²⁵ Bon notisia for di un pais leu, ta manera awa friu pa un garganta seku.

²⁶ Un bròn trubel, un pos venená, esei ta e hende hustu, ku ta laga mal hende dikt'é kon e tin ku biba.

²⁷ No ta bon pa kome muchu miel, pero ta un honor pa investigá loke ta difísil.

²⁸ Manera un siudat sin muraya i eksponé na peliger, asina t'e hende ku no por dominá su mes.