Proverbionan 23 - Papiamentu Bible 2013

— 6 —

¹ Ora bo sinta na mesa pa kome ku un hende ku tin poder, no lubidá niun momento so den kompania di ken bo ta.

² Si bo ta un gran komedó, sòru pa bo n' hasi kos di golos.

³ No laga tur loke e sirbi bo na mesa hinka bo den tentashon, pasobra bo ta sali engañá.

— 7 —

⁴ No mata kurpa pa bira riku, usa bo sintí.

⁵ Pasobra plaka tin ala, e ta disparsé for di bo bista manera un makuaku ta subi bai laria.

— 8 —

⁶ No laga un hende pichiri kombidá bo bin kome kuné, no laga loke e sirbi bo hinka bo den tentashon.

⁷ Miéntras e ta sinta saka sòm, e ta bisa: ‘Kome, no! Bebe poko mas!’ Pero no ta di kurason.

⁸ Lo bo arohá e tiki ku bo a kome i bo komplimèntnan tabata pòrnada.

— 9 —

⁹ No trata di splika un bobo nada na plaka chikí, pasobra tòg e n' ta apresiá loke bo ta bisa.

— 10 —

¹⁰ No kambia frontera bieu, ni subi tereno di wérfanonan ku mal intenshon,

¹¹ pasobra nan tin un defensor poderoso, Dios mes, lo E entamá un kaso kontra bo.

— 11 —

¹² Skucha ora ku ke papia ku bo pa bo bon.

— 12 —

¹³ No keda sin koregí un mucha, e n' ta muri si bo sut'é;

¹⁴ al kontrario si bo koregié, bo ta libr'é di morto.

— 13 —

¹⁵ Mi yu, dia bo bira sabí, lo no tin niun hende mas felis ku mi;

¹⁶ lo mi sinti un legria profundo, ora mi tende bo papia manera mester papia.

— 14 —

¹⁷ No envidiá esnan ku n' ta wòri ku Dios, mihó bo sòru pa semper abo tin rèspèt di SEÑOR.

¹⁸ E ora ei bo por warda un futuro yen di speransa yega, i lo bo n' keda desapuntá den loke bo ta spera.

— 15 —

¹⁹ Skucha i bira sabí, mi yu, skohe e kaminda rekto ku bo alma i kurpa.

²⁰ No anda k'esnan ku ta yena nan kurpa ku biña òf ta pròp nan stoma ku karni.

²¹ Pasobra un buraché òf un haragan golos ta kaba den pobresa. Es ku dia den dia afó ta drumi fuma lanta burachi, ta hañ'é ta bisti paña bieu.

— 16 —

²² Tende di bo tata ku a engendrá bo; no despresiá bo mama dia e bira bieu.

²³ Kumpra bèrdat i sabiduria, siñansa i komprenshon. No bende nan pa nada di mundu!

²⁴ Tata di un yu hustu i sabí, tin rason di sintié felis i orguyoso.

²⁵ Hasi pa bo mama i bo ta tata ta kontentu; hasi pa esun ku a karga bo den su seno sintié alegre.

— 17 —

²⁶ Mi yu, duna mi tur bo atenshon i sigui mi ehèmpel ku plaser;

²⁷ pasobra e muhé straño, e prostituta, ta manera un pos hundu i smal.

²⁸ E ta drumi warda manera un atrakadó i hasi e kantidat di hòmber ku ta kibra nan palabra, mas grandi.

— 18 —

²⁹ Ken ta esnan ku ta yora malai? Ken ta pleita? Ken ta keha? Ken tin herida sin tabatin nodi? Ken tin wowo trubel?

³⁰ Ta esnan ku no ta skit for di bibida, esnan ku ta bai eksperimentá traha bibida nobo.

³¹ No laga e biña kòrá ku ta lombra den e beker i ku ta baha bon, hinka bo den tentashon.

³² Na final e ta manera un kolebra ku ta morde i kousa doló.

³³ Bo ta kuminsá mira kosnan straño i papia i pensa kosnan perverso.

³⁴ Bo ta sinti bo riba laman, sintá te ariba ayá den un master.

³⁵ I lo bo bisa: ‘Nan a dal mi, pero mi no a sinti; gòlpia mi i mi n' tabata sa mes; pero asina mi spièrta mi ta bolbe buska mas bibida.’