Proverbionan 2 - Papiamentu Bible 2013

¹ Yu, si bo tuma mi palabranan hasi di bo i warda mi mandamentunan den bo mente,

² si bo habri bo orea pa sabiduria i bo mente pa konosementu,

³ si enberdat bo yora pa komprenshon i grita pa haña konosementu,

⁴ si bo busk'é, manera ta tras di plaka bo ta òf manera ta kore bo ta kore tras di un tesoro skondí,

⁵ e ora ei lo bo komprondé kiko ta nifiká ‘tin rèspèt di SEÑOR’, i e ora ei lo bo deskubrí kiko ta nifiká ‘siña konosé Dios’.

⁶ Pasobra SEÑOR ta duna sabiduria, ta for di su boka komprenshon i konosementu ta sali.

⁷ E ta garantisá éksito duradero pa hende hustu i ta un eskudo pa hende rekto.

⁸ E ta kuida esnan ku ta kana ku hustisia i ta protegé esnan ku ta fiel n'E.

⁹ E ora ei lo bo sa kiko ta nifiká: ta un hende rekto, biba un bida bon den bista di Dios i di hende, trata tur hende sin hasi distinshon. E ora ei lo bo sa kon bo tin ku biba.

¹⁰ Pasobra sabiduria lo bini den bo kurason i konosementu lo ta un plaser pa bo alma.

¹¹ E ora ei koutela i konosementu lo protegé bo i warda bo.

¹² Sabiduria lo protegé bo kontra mal hende, kontra hende ku ta trose bèrdat,

¹³ kontra esnan ku ta kita for di bon kaminda pa sigui esun malu,

¹⁴ kontra esnan ku ta gosa di kos ku ta malu i alegrá nan den perversidat di maldat,

¹⁵ kontra esnan ku ta kana riba kaminda korkobá i ta malisioso den nan andá.

¹⁶ Sabiduria lo warda bo tambe di e muhé ku no ta di bo, maske kuantu e trastia bo;

¹⁷ di e muhé ku a bandoná su esposo i ta lubidá su kompromiso ku Dios.

¹⁸ Su kas ta bira bo pèrdishon, ta nifiká bo morto.

¹⁹ Es ku bai serka un muhé asina no ta bolbe hamas riba e kaminda di bida.

²⁰ Asina ta: kana den kaminda di hende bon i keda riba kaminda di hende hustu.

²¹ Esnan ku ta honesto por keda den e pais, esnan ku ta hustu ta haña un lugá pa keda biba.

²² Pero ta kore ku esnan ku no tin Dios i ta bari saka esnan ku no ta fiel na Dios.