Proverbionan 11 - Papiamentu Bible 2013

¹ SEÑOR ta repudiá esnan ku ta kònkel ku balansa, ma ta keda kontentu ku esnan ku ta usa peso eksakto.

² Ora bo ta orguyoso bo ta pasa bèrgwensa, pero sabiduria ta pa hende humilde.

³ Rektitut ta guia hende rekto, pero falsedat ta destrukshon di hende falsu.

⁴ Rikesa no ta yuda dia Dios ta bai kastigá, hustisia ta libra hende di morto.

⁵ Si bo biba na un manera hustu bo ta hasi bo kaminda règt, si bo hasi maldat, bo mes maldat ta pone bo kai.

⁶ Hustisia ta libra hende rekto, pero hende falsu ku traha chake pa otro hende, e mes ta kai aden.

⁷ Pa hende ku ta hasi maldat morto ta fin di tur kos, nan no tin nada mas di spera di nan rikesa.

⁸ Hende hustu ta keda librá di mizeria, mal hende ta haña nan ku e mizeria.

⁹ Palabra di mal hende ta destruí su próhimo, konosementu di hende hustu ta salbashon.

¹⁰ Ora bai hende hustu bon, henter siudat ta kontentu, ora hende ku no ta fiel na Dios muri, gritu di alegria ta resoná.

¹¹ Un siudat ta engrandesé ora hende hustu dun'é nan bendishon, ma palabra di mal hende ta ruin'é.

¹² Hende ku no ta usa su sintí ta papia di otro hende ku menospresio, hende ku sintí ta keda ketu.

¹³ Hasidó di redu no sa warda sekreto, hende konfiabel sí.

¹⁴ Si no tin guia un pueblo ta bai pèrdí, hopi konsehero bon ta trese solushon.

¹⁵ Es ku para bòrg pa hende ku e no konosé bon ta mal pará, es ku evitá di para bòrg por keda trankil.

¹⁶ Hende muhé ku grasia ta risibí honor, hende hòmber brutu ta optené solamente rikesa.

¹⁷ Bo ta yuda bo mes, ora bo yuda otro hende, bo ta perhudiká bo mes, ora bo perhudiká otro hende.

¹⁸ Ganashi di hende ku no tin Dios, ta engañoso, es ku sembra hustisia ta kosechá un suèldu duradero.

¹⁹ Esnan ku kore tras di hustisia ta biba, esnan ku kore tras di maldat ta muri.

²⁰ SEÑOR ta odia hende ku mente perverso, pero ta stima esnan ku ta hasi bon.

²¹ Sigur ta, ku hende ku hasi maldat ta haña kastigu, pero hende hustu ta skapa.

²² Beyesa di un muhé ku no ta usa su sintí, ta manera un renchi di oro pasá den nanishi di un porko.

²³ Deseo di hende hustu semper ta sali bon; speransa di mal hende ta kaba ku ira.

²⁴ Tin hende generoso, ku ta risibí mas ku nan ta duna, i tin hende pichiri ku ta muri bashí.

²⁵ Es ku hasi bon, bon ta p'e, es ku duna alivio, ta haña alivio.

²⁶ Lo maldishoná hende ku stòk trigo pa e tin probecho, i bendishoná esun ku pon'é na benta.

²⁷ Es ku kore tras di kos bon ta buska pa haña grasia, es ku kore tras di kos malu, malu ta p'e.

²⁸ Es ku konfia riba su rikesa ta keda ruiná, es ku konfia den Dios, ta manera blachi fresku ku a spreit.

²⁹ Es ku deskuidá su famia ta keda sin nada, un bobo semper lo ta katibu di un sabí.

³⁰ Bon obra di hende hustu ta bendishon pa tur hende, hende sabí ta gana kurason di tur hende.

³¹ Si hende hustu ta haña nan pago na e banda akí di graf, ku kuantu mas rason mal hende i pekadó!