Predikador 8 - Papiamentu Bible 2013

¹ Niun hende no ta realmente sabí, pasobra niun n' ta kapas di penetrá te den sentido di kosnan. Pero si un hende ta sabí sabiduria ta reflehá for di su kara, kambia e ekspreshon duru.

Obedesé rei

² Di mas mihó ta: hasi loke rei ta ordená, pasobra bo mester a primintí esei bou di huramentu.

³ Ora bo ta serka rei, no sali bai lag'é promé ku ora, ni keda persistí tampoko den un kaso ku por kousa daño, pasobra tòg ta loke e ke e ta hasi.

⁴ Loke rei bisa ta lei. Ken lo por riska pidié kuenta i rason?

⁵ Esun ku aten'é na regla, no ta hañ'é den problema. Hende sabí ta komprondé ki ora i kon mester aktua.

⁶ Pasobra tur kos tin su tempu eksakto i su prosedura korekto. Ounke tin un problema komun ta limitá kada hende.

⁷ Hende no sa loke futuro ta enserá. Ken lo por kont'é e kos ei?

⁸ Niun hende no tin kòntròl riba bida pa por keda hala rosea, niun hende no por posponé su morto, tempu di guera niun hende no ta haña verlòf, for di maldat no por saka probecho.

⁹ Tur e kosnan akí mi a mira i mi a paga tinu na kada kos ku a sosodé riba e mundu akí, miéntras esun hende ta manda riba e otro pa perhudik'é.

¹⁰ Ademas mi a mira ku hende ku hasi maldat ta haña entiero, pero hende ku biba bon tin ku bai for di e lugá sagrado i ta lubidá riba nan den siudat. Esei tambe ta apsurdo.

¹¹ Komo no ta kastigá maldat mesora, hende ketu bai ta buska pa hasi maldat.

¹² Ounke un mal hende kometé shen krímen i tòg keda biba largu, mi sa ku lo bai hende ku tin rèspèt di Dios i ta teme Dios, mihó;

¹³ i ku lo no bai mal hende bon, nan lo no biba largu, nan bida lo no larga manera un sombra, pasobra nan no tin rèspèt di Dios.

¹⁴ E situashon apsurdo akí tambe ta tuma lugá: tin kos ta pasa hende hustu komo si fuera ta bandidu nan ta i tin kos ta pasa bandidu komo si fuera ta hende hustu nan ta. Esaki tambe ta apsurdo.

¹⁵ P'esei mi ta gaba esnan ku ta gosa di nan bida, pasobra e kos di mas mihó pa hende riba e mundu akí ta ketu bai: kome i bebe i ta kontentu. Ta e úniko kos ku e tin tanten ku e ta mata kurpa den e eksistensia kòrtiku ku Dios ta dun'é aki riba mundu.

¹⁶ Ora mi a pone mi pa konosé sabiduria i pa mira e tarea pisá akí riba mundu, e tarea akí di mata kurpa di dia i anochi sin sosegá nunka,

¹⁷ e ora ei mi a deskubrí tur kos ku Dios a hasi. Niun hende no por komprondé loke Dios ta hasi aki riba mundu, ni maske kuantu esfuerso hende hasi e no ta haña sa. Asta ora un hende sabí pretendé ku e sa, den realidat e no por a haña sa.