Predikador 7 - Papiamentu Bible 2013

Tokante sabiduria i sentido di tur kos

¹ Mihó un bon nòmber ku hole dushi, mihó e dia di morto ku e dia di nasementu.

² Mihó bai kas mortuorio ku bai kas di fiesta. Pasobra pa tur hende bida ta kaba ku nan entiero; hende bibu mester keda kòrda e kos akí.

³ Mihó yora ku hari, pasobra hende tristu ta siña konosé bida.

⁴ Hende sabí ta pensa riba morto, pero hende bobo ta pensa riba fiesta so.

⁵ Mihó bo tende ora un hende sabí skual bo ku bo sinta skucha kantika di hende bobo.

⁶ Pasobra harimentu di hende bobo ta meskos ku e krakmentu di sumpiña bou di un pòchi. Esei tambe ta lokura.

⁷ Ta sigur ku loke bo gana ku ekstorshon ta mancha sano huisio, i regalo tumá bou di mesa ta daña karakter di hende.

⁸ Mihó husga algu na final ku na prinsipio, mihó tene pasenshi ku tin idea.

⁹ No eksitá demasiado lihé: ta hende bobo sa eksitá.

¹⁰ No puntra di kon ántes aya tempunan tabata mihó ku awendia; puntramentu di kos asina no ta demostrá sabiduria.

¹¹ Pa esnan na bida ta un bentaha di tin sabiduria fuera di un herensia.

¹² Tantu ku sabiduria komo ku plaka bo ta sinti bo seif. Pero konosementu tin e bentaha akí ku sabiduria ta laga esnan ku gara n'e biba di bèrdat.

¹³ Tuma na konsiderashon loke Dios a hasi: Ken por hasi loke El a traha korkobá, règt?

¹⁴ Sea felis, ora ta bai bo bon; pero ora ta bai bo malu, tuma na konsiderashon ku Dios a traha tantu esun komo e otro. Ta p'esei hende no por deskubrí nada tokante nan futuro.

¹⁵ Den mi eksistensia pasahero mi a mira tur dos sorto di hende: hende hustu ku ta muri apesar di nan bondat i mal hende ku ta biba hopi aña apesar di nan maldat.

¹⁶ No hasi nada bon di mas, ni sea sabí di mas — pakiko destruí bo mes?

¹⁷ No sea mal hende di mas, ni hasi kos di bobo — di kon muri promé ku bo ora?

¹⁸ Ta bon pa gara esun konseho, sin laga e otro kai. Pasobra es ku teme Dios lo logra ku tur dos.

¹⁹ Pa motibu di su sabiduria un hende sabí ta mas fuerte pará ku dies gobernante poderoso.

²⁰ Tene bo na tur dos konseho, pasobra riba mundu no tin niun hende hustu ku ta hasi bon sin peka nunka.

²¹ P'esei no paga tinu na tur loke hende ta bisa; sino bo ta tende asta kon bo katibu ta maldishoná bo.

²² Pasobra abo tambe — bo no por laga di sa esei — a papia hopi bia malu di otro hende.

²³ Asina mi a buska sabiduria den tur kos. Mi a pensa: ‘Mi ke bira sabí.’ Pero sabiduria a keda fo'i mi alkanse.

²⁴ Tur loke ta eksistí ta fo'i mi alkanse! Tur ta demasiado profundo i niun hende no por komprondé nan.

²⁵ Mi a hasi tur kos pa haña konosementu i a yega awor na un konklushon. Mi mester por a mira tòg, ku esun ku ta inhustu ta bobo i ku esun ku no ta tende di Dios n' ta nada mas ku dònferstan.

²⁶ Mi a topa un kos ku ta mas malu ku morto: un muhé ku ta pone trampa ku su kurason i ta gara tene ku su brasanan. Es ku ta agradá Dios ta skapa di e muhé ei, pero un pekadó ta kai den su trampa.

²⁷ ‘Esaki,’ Predikador ta bisa, ‘mi a deskubrí pokopoko ora mi tabata buska komprondementu.’

²⁸ Mi a sigui buska, pero sin hopi resultado. Den mil hende mi a haña solamente ún hende ku tabata pone hende respet'é, pero no tabata un muhé.

²⁹ Mi a topa solamente lo siguiente: ku Dios a traha hende perfekto, pero ku hende mes a hasi su bida kompliká.