Predikador 6 - Papiamentu Bible 2013

¹ Mi a mira un kos malu riba e mundu akí ku ta pone hende sufri mashá.

² Dios ta duna un hende rikesa, gran poder i prestigio, tur loke e por deseá. Pero Dios no ta lag'é gosa di nan; na lugá di dje un strañero lo gosa di nan. Esei ta sin sentido, un situashon di abusu, hopi di lamentá.

³ Suponé ku un hende haña shen yu i un bida mashá largu, pero e no por gosa di nan i ni sikiera e n' ta haña un entiero. E ora ei pa mi un mucha ku a nase morto ta mas privilegiá.

⁴ Pasobra ounke e mucha akí ta kai pèrdè den bashí, den skuridat, kaminda ta lubidá su nòmber,

⁵ i ounke e no a haña chèns di mira solo ni sa nada, sikiera e tabatin mas trankilidat ku e hòmber aya,

⁶ ku lo por a biba 2000 aña i sinembargo no por a disfrutá di su biennan. Bisa mi awor al fin i al kabo tur hende n' ta mes kaminda nan ta bai?

⁷ Hende ta púluwe pa por kome, pero nunka e no tin sufisiente.

⁸ Ki bentaha hende sabí tin riba hende bobo? Kiko un hende pober ta gana si e sa kon e tin ku komport'é dilanti di otro hende?

⁹ Mihó gosa di tur loke bo tin, ku semper bai bo ke mas. Esei tambe ta sin sentido, bo n' ta gana nada k'esei.

¹⁰ Pasobra kiko ku por pasa bo, ta fihá mashá tempu pasá; ta evidente tòg: hende no por kompetí ku Dios, ku ta mas poderoso.

¹¹ Mas bo papia riba e kos ei, mas ko'i loko e ta bira. I kiko bo ta gana?

¹² Pasobra ningun hende no sa kiko ta bon pa hende den e bida pasahero i kòrtiku akí; e ta pasa bai manera sombra. I ningun hende lo no por konta otro kiko lo pasa riba e mundu akí despues di su morto.