Predikador 2 - Papiamentu Bible 2013

Plaser ta ilushon

¹ Mi a pensa den mi mes: ‘Laga mi tèst plaser wak ta kiko e tin aden.’ Pero esei tambe a proba di ta puru ilushon.

² Mi a ripará ku harimentu ta kos di hende bobo, i kiko bo tin na plaser?

³ Miéntras sabiduria tabata guia mi mente ainda, mi a buska manera pa zeta mi kurpa ku bibida i a brasa bobedat, te ora mi por a mira kiko ta bon pa hende mortal hasi durante e tiki dianan di nan bida aki riba mundu.

⁴ Tambe mi a hasi kosnan grandioso. Mi a konstruí kasnan pa mi mes i a traha hopi hòfi di wendrùif.

⁵ Mi a traha hardin i parke i planta tur sorto di palu di fruta aden.

⁶ Mi a traha baki di awa pa muha e palunan ku tabata spreit den boskenan.

⁷ Mi a kumpra katibu hòmber i muhé i e yunan ku nan tabata haña tambe a bira mi katibu. Tambe mi tabata poseé mas karné, kabritu i baka ku tur mi antesesornan na Herusalèm.

⁸ Mi a akumulá oro i plata, presiosidatnan di e reinan di paisnan ku mi tabata goberná. Mi a sòru pa kantante hòmber i muhé i tambe pa muhé pa dibertí nos ku ta hende hòmber.

⁹ Mi tabata mas riku i mas poderoso ku tur mi antesesornan na Herusalèm; tòg mi a keda sabí.

¹⁰ Tur loke mi wowo tabatin gana di mira, m'a laga nan mira. Mi n' keda sin gosa. Por sierto mi a sinti mi kontentu ku tur mi esfuersonan i esaki tabata mi rekompensa pa tur mi trabou.

¹¹ Pero despues mi a mira bèk riba tur loke mi a hasi i a repasá kuantu molèster e tabata pa mi. Mi a konkluí ku tur kos tabata un ilushon, un hungamentu di kore kue ku bientu. Kiko bo ta logra ku esei?

¹² Despues mi a kuminsá reflekshoná riba sabiduria, estupides i bobedat. Kiko e rei ku sigui por hasi? Nada otro ku loke ta hasí kaba.

¹³ Mi a bin realisá ku mihó bo ta sabí ku bo ta bobo, meskos ku bo tin mas na klaridat ku bo tin na skuridat.

¹⁴ Un hòmber sabí ta mira loke e ta hasi, pero un hòmber bobo ta dualu den skuridat. Pero na mes tempu mi a determiná ku ta mesun kos ta warda nan dos.

¹⁵ E ora ei mi a pensa den mi mes: si ta mesun kos ta warda mi ku kualke hende kabes habrí, ta pakiko mi a hasi tantu esfuerso asina pa mi bira sabí? I mi a konkluí pa mi mes: Na esaki tambe bo ta mira ku bida ta un ilushon.

¹⁶ Pasobra n' ta keda kòrda semper riba un hende, sea ku e tabata sabí òf bobo. Ta lubidá tur dos vapvap. Ku hende ta sabí òf bobo, muri nos tur ta muri.

¹⁷ I mi a haña asko di bida, mi a eksperensiá tur e matamentu di kurpa aki na mundu manera un mizeria grandi, pasobra tur kos ta ilushon i un hungamentu di kore kue ku bientu.

¹⁸ Mi tabata disgustá den tur kos ku mi a mata kurpa p'e aki na mundu, pasobra mi no por bai ku nan, mi mester laga nan atras pa esun ku ta sigui mi.

¹⁹ I un kos tabata sigur: si e hende tabata sabí òf bobo, lo e bira doño di tur kos ku mi a logra alkansá ku tantu trabou i sabiduria den e mundu akí. I esei ta apsurdo!

²⁰ Ora mi a mira kiko mi a alkansá den e mundu akí, mi a keda desilushoná di a traha tantu asina.

²¹ Pasobra un hende sa di logra algu ku hopi molèster i esfuerso, ku sintí i konosementu, anto e mester lag'é atras pa un otro, ku no a hasi nada nada p'e, pero tòg ta sali di bon. Aki bo ta bolbe mira: tur kos ta bientu i un abusu formal.

²² Pasobra en realidat kiko e hende ta gana ku tur e matament'i kurpa i ku tur su esfuersonan?

²³ Su bida ta trese fèrdrit so p'e, su trabou n' ta dun'é nada mas ku mizeria; asta anochi e n' ta haña sosiegu. Esei tambe ta apsurdo!

²⁴ Úniko kos ku ta keda ta kome, bebe i gosa di loke bo a mata kurpa p'e. I mi a komprondé ku asta esei ta den man di Dios.

²⁵ Pasobra ken por kome òf bebe sin Dios?

²⁶ Pasobra Dios ta duna komprondementu, konosementu i legria na esnan ku ta tende di djE. Pero esnan ku no ta obedes'É, E ta laga traha i spar pa e hende ku sí ta tende di djE. Matament'i kurpa tambe ta ilushon, hungamentu di kore kue ku bientu.