Predikador 11 - Papiamentu Bible 2013

Hasi bon uso di bo tempu

¹ Tira bo pan riba awa, un dia lo bo hañ'é bèk.

² Invertí bo propiedat den shete òf ocho negoshi; bo no sa nunka ki desaster por pasa riba mundu.

³ Ora nubianan ta kargá, nan ta basha áwaseru riba tera. Un palu por kai pa part'i nort òf pa part'i zùit, pero kaminda e kai, ei e ta keda bentá.

⁴ Es ku keda paga tinu na bientu, no ta haña chèns di sembra, es ku keda wak nubia, no por kosechá nunka.

⁵ Bo no sa ki ora bientu ta bira, bo no sa kon bida ta krese den barika di un muhé; asina tampoko bo no sa kiko tur e kosnan ku Dios Kreador ta hasi.

⁶ Sembra simia mainta i no sinta man krusá anochi, pasobra bo no sa nunka kua di e sembramentunan ta resultá mihó, e promé òf di dos, òf ku ta tur dos ta duna resultado.

Kòrda riba bo Kreador tanten bo ta hóben

⁷ Lus ta agradabel, ta un goso mira solo bria.

⁸ Kuantu aña ku un hende por biba, lag'é gosa di tur. Pero lag'é kòrda sí, ku morto ta dura mas largu. Tur kos ku mester pasa ta sin sentido.

⁹ Gosa di bo hubentut, gosa tanten bo ta hóben ainda. Hasi loke bo ta gusta, loke bo tin gana di hasi, pero kòrda sí ku bo mester duna kuenta na Dios.

¹⁰ No bai sinta preokupá, sòru pa bo keda salú, pasobra ta un bia so bo ta yòn.