Predikador 10 - Papiamentu Bible 2013

¹ Meskos ku muska morto ta daña holó di perfume, asina un tiki bobedat ta destruí basta sabiduria.

² Mente di hende sabí ta inkliná na kos bon, pero esun di hende bobo ta inkliná na kos malu.

³ Unda ku un bobo kana, hende ta mira ku e no tin sintí; e ta laga tur hende ripará kon bobo e ta.

⁴ Ora un gobernante rabia ku bo, no bandoná bo trabou, pasobra trankilidat por plakia erornan grandi.

⁵ Mi a mira un kos mashá malu aki riba mundu, un eror ku outoridatnan ta keda hasi ketu bai:

⁶ ta alsa bobedat dun'é hopi posishon altu, miéntras hende kapas ta keda den posishonnan abou.

⁷ Mi a mira katibunan ta kore riba kabai i prínsipenan ku mester a bai na pia meskos ku katibu.

⁸ Es ku koba un buraku por kai aden, i kolebra por morde esun ku basha un muraya abou.

⁹ Es ku kap piedra por heridá su mes; es ku kap palu ta kore riesgo di haña herida na su kurpa.

¹⁰ Si e hacha ta stòmpi i su rant no ta skèrpi, mester di mas forsa, pero sabiduria ta laga bo logra.

¹¹ Pakiko mester di un dominadó di kolebra si e kolebra a morde kaba promé ku lag'é kai den trans?

¹² Loke un hende sabí bisa ta pon'é gana simpatia, pero un hende bobo ta horka su kurpa ku loke e ta pretendé.

¹³ E ta kuminsá ku papia kosnan sin pia sin kabes i ta kaba ku blèblè kosnan peligroso.

¹⁴ I e loko ta papia papia numa; niun hende no sa kiko lo sosodé den futuro; ta ken por kont'é kiko lo pasa despues ku e muri?

¹⁵ E klètsmentu sin stòp di hende bobo ta asina un kansansio ku nan mes no sa na unda nan a kuminsá.

¹⁶ Ai di bo, o pais di kua e rei ta un nobato i di kual e prínsipenan ta kore paranda for di mainta.

¹⁷ Felis e pais ku tin un rei di famia noble, kaminda e noblesa ta bai mesa na ora fiho, ta kome pa nan biba i no ta biba pa bebe burachi.

¹⁸ Si bo ta floho i bo no ta saka un man, e ora ei e balkinan lo bini abou i e dak lo kuminsá lèk.

¹⁹ Fiesta ta pa hari, i biña ta hasi hende kontentu, pero pa tur kos bo mester di plaka.

²⁰ No kritiká rei, ni sikiera den pensamentu. No papia malu di hende riku, ni maske bo ta so, pasobra paranan ta bula i nan por bai bis'é.