Predikador 1 - Papiamentu Bible 2013

Tur kos ta ilushon

¹ Ata palabranan di Predikador. E tabata desendiente di David i rei na Herusalèm.

² ‘Ilushon,’ Predikador ta bisa, ‘puru ilushon, tur kos ta ilushon.’

³ Kiko matament'i kurpa pa kos di mundu ta bal?

⁴ Un generashon ta muri otro generashon ta nase. Loke ta keda meskos ta mundu.

⁵ Solo ta sali i solo ta baha. Morto kansá e ta pura bai su punt'i salida pa kuminsá su gira di nobo.

⁶ Bientu ta supla pa zùit i bira pa nort, lora, lora, pa bolbe kuminsá di nobo.

⁷ Tur riu ta kore bai laman, pero laman no ta yena nunka. For di kaminda riunan ta sali, ei nan ta bai bèk.

⁸ Tur kos t'un kansansio, un kansansio indeskriptibel, nunka nos no por mira tur kos, nunka nos no por tende tur kos.

⁹ Loke a pasa, lo pasa atrobe i loke a keda hasí, lo keda hasí atrobe; no tin nada nobo den e mundu akí.

¹⁰ Semper lo tin hende ku ta bisa: ‘Esaki sí ta algu nobo!’ Pero e kos ei a eksistí kaba siglonan promé ku nos.

¹¹ No tin niun hende ku ta kòrda mas riba e hendenan ku a biba promé ku nos i e hendenan ku lo biba despues di nos tampoko lo no kòrda riba esnan ku a biba promé ku nan.

Sabiduria ta ilushon

¹² Ami, Predikador, tabata rei di Israel na Herusalèm.

¹³ Mi a disidí di studia i eksplorá tur loke a sosodé aki na mundu pa medio di sabiduria; loke Dios a duna hende pa okupá nan kuné ta un tarea diario hopi pisá.

¹⁴ Mi por bisa ku mi a mira tur kos aki na mundu. Mi konklushon ta, tur kos, sí tur kos ta ilushon: un hungamentu di kore kue ku bientu.

¹⁵ Loke ta hechu no por bira bèrdè mas, i no por konta loke no ta eksistí.

¹⁶ Mi a pensa den mi mes: ‘Mira, mi a krese den sabiduria mas ku kualke hende ku a goberná na Herusalèm; mi por a mira hopi di konosementu i di sabiduria di bida.’

¹⁷ Despues di tur e tempu akí di opservashon mi a bisa: ‘Tòg mi mester por mira e diferensia entre sabí ku bobo, entre inteligente ku kabes duru.’ Mi a bin realisá ku esaki tambe ta un hungamentu di kore kue ku bientu.

¹⁸ Pasobra mas sabiduria mas problema, mas konosementu mas tristesa.