Numbernan 9 - Papiamentu Bible 2013

Guia pa selebrashon di Pésag

¹ Den desierto di Sinai SEÑOR a papia ku Moises. Tabata den promé luna di e di dos aña ku nan a sali for di Egipto. El a bisa:

² ‘E israelitanan mester selebrá fiesta di Pésag riba e dia fihá,

³ riba e di dieskuater dia di e luna akí, ora nochi ta bai sera. Nan mester selebr'é segun lei i regla vigente.’

⁴ Moises a duna e israelitanan e òrdu akí

⁵ i riba e dia fihá nan a selebrá fiesta di Pésag den desierto di Sinai. Nan a sigui e òrdunan di SEÑOR estriktamente.

⁶ Pero tabatin algun hòmber ku no por a selebrá fiesta di Pésag e dia ei. Nan tabata impuru pasobra nan a mishi ku un kadaver. Nan a bai serka Moises ku Aaron

⁷ i bisa: ‘Nos a bira impuru pasobra nos a mishi ku un kadaver. Pero esei ta motibu pa ekskluí nos? Nos tambe lo tin gana di ofresé SEÑOR e sakrifisio di Pésag, huntu ku e otro israelitanan riba e dia fihá.’

⁸ Moises a bisa: ‘Warda mi aki, mi ta bai tende kiko SEÑOR ta spera di boso.’

⁹ SEÑOR a ordená Moises pa bisa e israelitanan:

¹⁰ ‘Si un hende a bira impuru pasobra el a mishi ku un kadaver òf e ta riba un biahe largu, e mester selebrá fiesta di Pésag tòg. Esei ta konta pa boso i pa boso desendientenan.

¹¹ Den e kaso ei nan mester selebr'é un luna despues, esta riba e di dieskuater dia den e di dos luna ora nochi ta bai sera. Nan mester kome e lamchi di Pésag ku pan sin zürdeg i ku yerba marga.

¹² Nan no mag kibra wesu di e bestia ni laga nada keda te su manisé. Nan mester tene kuenta ku henter lei di selebrashon di Pésag.

¹³ Saka for di komunidat di Israel tur esnan ku apesar di ta puru i no ta di biahe, tòg ta keda sin selebrá fiesta di Pésag. Nan mester haña kastigu pasobra nan no a ofresé sakrifisio di Pésag riba e dia fihá.

¹⁴ Si un strañero ku ta biba serka boso ke selebrá fiesta di Pésag na honor di SEÑOR, e mester tene kuenta ku henter lei di selebrashon di Pésag. Pa nan i pa esnan nasé israelita e mesun leinan ta konta.’

E nubia riba tènt di enkuentro

¹⁵ Asina a kaba di konstruí e tènt sagrado, e arka di aliansa, un nubia a tap'é. Anochi e nubia tabata bira manera un kandela i tabata keda asina te su manisé.

¹⁶ Asina tabata kontinuamente: den dia e nubia tabata tapa e tènt i anochi e tabata duna klaridat meskos ku un kandela.

¹⁷ Kada be ku e nubia tabata alehá su mes for di riba e tènt, e israelitanan tabata desarmá nan kampamentu i kaminda e nubia tabata keda para, nan tabata lanta e kampamentu atrobe.

¹⁸ Di e manera akí e israelitanan tabata desarmá nan kampamentu riba òrdu di SEÑOR i tabata lant'é atrobe riba òrdu di SEÑOR. Tanten e nubia tabata keda para riba e tènt sagrado, nan no tabata kita e kampamentu fo'i djei.

¹⁹ Ora e nubia tabata keda para hopi tempu riba e tènt sagrado, e israelitanan tabata atené nan na e indikashon ei di SEÑOR. Nan nó tabata desarmá e kampamentu.

²⁰ Ora ta poko dia so e nubia tabata keda para riba e tènt sagrado, nan tabata atené nan ora di lanta i ora di desarmá e kampamentu na e òrdu ei di SEÑOR.

^21-22 Ku e nubia a keda un anochi so riba e tènt sagrado, òf un dia òf dos dia òf henter un luna, nunka e israelitanan no a desarmá e kampamentu promé ku e nubia alehá su mes fo'i djei.

²³ Riba òrdu di SEÑOR nan tabata lanta nan kampamentu i riba òrdu di SEÑOR nan tabata desarm'é. Nan tabata atené nan na e indikashonnan di SEÑOR, ku SEÑOR a duna nan pa medio di Moises.