Numbernan 6 - Papiamentu Bible 2013

Regla pa nazireonan

¹ SEÑOR a ordená Moises pa

² bisa e israelitanan: ‘Ora un hende hòmber òf muhé hasi e promesa di konsagrá su mes na SEÑOR komo nazireo,

³ e mester apsten'é di biña i di serbes. E no mag bebe binager trahá di drùif ni otro binager. Tampoko e no mag bebe djus di drùif, ni kome drùif fresku òf rasenchi.

⁴ Tur e tempu ku e ta nazireo e no mag kome nada ku ta bini di mata di wendrùif, ni maske ta e pipita òf kaska.

⁵ Durante su promesa e no mag feita su kabei ni su barba. E mester keda apartá pa sirbishi di SEÑOR i laga su kabei krese te ora e tempu ku el a konsagrá su mes na SEÑOR pasa.

⁶ Tur e tempu ei e no mag yega den bisindario di un defuntu tampoko.

⁷ Ni maske ta su tata òf su mama òf su ruman hòmber òf su ruman muhé a muri. E no mag hasi su mes impuru dor di mishi ku nan, pasobra e ta konsagrá na SEÑOR, manera su kabei largu ta demostrá.

⁸ Tur e tempu ku e ta nazireo e ta apartá pa sirbishi di SEÑOR.

⁹ Si e bira impuru pasobra un hende den su serkania ta muri inesperá, e mester feita su kabei riba e di shete dia, dia ku ta deklar'é puru.

¹⁰ Riba e di ocho dia e mester hiba dos tòrteldùif òf dos pichon pa saserdote na entrada di tènt di enkuentro.

¹¹ Saserdote mester ofresé un di e bestianan komo sakrifisio pa pordon di piká i e otro komo sakrifisio di kandela pa drecha tur kos atrobe entre e nazireo i SEÑOR. E mes dia ei e hende mester konsagrá su mes na SEÑOR

¹² i bolbe hasi e promesa pa e mesun periodo. Komo sakrifisio di debe e mester ofresé un lamchi chubatu. E periodo promé no ta konta pasobra el a bira impuru den e periodo ei.

¹³ E siguiente regla ta konta pa e nazireo ora su tempu di promesa ta kabando. E mester bai na entrada di tènt di enkuentro

¹⁴ i ofresé SEÑOR un lamchi chubatu di karné sin defekto komo sakrifisio di kandela, un lamchi di karné sin defekto komo sakrifisio pa pordon di piká i un chubatu di karné sin defekto komo sakrifisio di pas.

¹⁵ Tambe un makutu ku pan sin zürdeg trahá di hariña fini, arepa diki trahá ku zeta, arepa plat sin is huntá ku zeta. E mester pone e ofrenda vegetal i e biña ku nan ta basha komo ofrenda, huntu.

¹⁶ Saserdote mester presentá tur e kosnan ei na SEÑOR i ofresé tambe e sakrifisio di kandela ku e sakrifisio pa pordon di piká.

¹⁷ E mester ofresé e chubatu komo sakrifisio di pas na SEÑOR huntu ku e makutu ku pan sin zürdeg, tambe e ofrenda vegetal ku e biña ku ta basha komo ofrenda.

¹⁸ Despues e nazireo mester feita su kabei, señal di su konsagrashon, na entrada di tènt di enkuentro i tira e kabei den e kandela di sakrifisio di pas.

¹⁹ Ora e kaba di hasi esei saserdote ta kohe e skouder herebé di e chubatu di karné, un arepa diki sin is for di e makutu i un arepa plat sin is i pone nan den su man.

²⁰ Despues saserdote ta hisa nan na laria komo rito di presentashon pa ofresé nan na SEÑOR. E ofrendanan akí ta sagrado. Nan ta destiná pa saserdote, huntu ku e pechu i e pia di patras. Despues di esei e nazireo mag bebe biña atrobe.

²¹ Esaki ta e regla relashoná ku e nazireo ku ta konsagrá su mes na SEÑOR pa medio di un promesa i e ofrendanan ku e mester presentá SEÑOR e ora ei. E mag hasi otro ofrenda boluntariamente, pero en todo kaso e mester hasi e ofrendanan ku el a primintí dia el a hasi e promesa di konsagrá su mes na SEÑOR.’

²² SEÑOR a ordená Moises

²³ pa bisa Aaron i su yunan: ‘Ora boso ta bendishoná e israelitanan usa e palabranan akí:

²⁴ SEÑOR bendishoná boso i warda boso,

²⁵ SEÑOR wak boso ku kariño i mustra boso su bondat,

²⁶ SEÑOR wak boso ku amor i duna boso pas i prosperidat.

²⁷ Si nan menta mi nòmber asin'ei riba kabes di e israelitanan, lo Mi bendishoná e israelitanan.’