Numbernan 4 - Papiamentu Bible 2013

Tarea di e levitanan di famia Kehat

¹ SEÑOR a bisa Moises ku Aaron:

² ‘Konta entre e levitanan e famianan di Kehat ku tin entre trinta pa sinkuenta aña; konta nan segun nan famia i nan generashon,

³ tur ku ta bini na remarke pa hasi trabou den tènt di enkuentro.

⁴ Nan ta responsabel pa e ophetonan di mas sagrado.

⁵ Ora ta bai desarmá kampamentu, Aaron ku su yunan mester drenta e tènt i kita e kortina ku ta tene e santuario for di bista, pa tapa e arka di aliansa kuné.

⁶ Nan mester habri un paña di tapa di kueru fini riba dje i riba esei un paña blou. Kaba nan mester hinka e baranan di palu pa karg'é.

⁷ Riba e mesa di pan konsagrá nan mester habri un paña blou i pone skòter, skalchi, kòmchi i kanika pa sakrifisio di biña; e pan sagrado ta keda riba e mesa.

⁸ Riba tur e kosnan ei nan mester habri un paña kòrá bibu, tapa esaki ku un paña di kueru fini i hinka e baranan di palu pa transport'é.

⁹ Nan mester tapa e kandelar ku su lampinan, e snùiternan, e bakinan i tur e kanikanan pa zeta ku un paña blou,

¹⁰ lora e kandelar ku tur loke ta pertenesé n'e den un paña di kueru fini i pone tur kos riba un dragbar.

¹¹ Riba e altá di oro nan mester habri un paña blou, tap'é ku un paña di kueru fini i hinka e baranan pa transport'é.

¹² Nan mester pone tur loke nan ta usa pa sirbishi den santuario riba un paña blou, tap'é ku un paña di kueru fini i pon'é riba un dragbar.

¹³ Nan mester bari kita e shinishi vèt for di riba e altá di sakrifisio di kandela i habri un paña kòrá püs riba dje.

¹⁴ Eiriba nan mester pone e ophetonan ku ta pertenesé n'e, manera panchi di kandela, fòrki, skèp i skalchi di ofrenda. Kaba nan mester habri un paña di kueru fini riba dje i hinka e baranan pa karg'é.

¹⁵ Despues ku Aaron ku su yunan kaba di tapa parti di e tènt ku tur opheto sagrado, e desendientenan di Kehat mag bini pa karga tur kos. Pero nan no mag mishi ku e ophetonan mes, sino nan ta muri. Ke men ku e desendientenan di Kehat ta responsabel pa kargamentu di e tènt di enkuentro i tur opheto ku ta pertenesé n'e.

¹⁶ Eleazar, yu di saserdote Aaron, mester kontrolá e zeta pa lampi, e sensia di holó dushi, e ofrenda vegetal diario i e zeta di konsagrashon. E mester kontrolá henter e tènt ku tur loke tin aden.’

¹⁷ SEÑOR a bisa Moises ku Aaron:

¹⁸ ‘Boso mester perkurá pa e miembronan di famia di Kehat for di tribu di Levi no haña kastigu di morto.

¹⁹ Ora nan bini pa karga e ophetonan sagrado, Aaron ku su yunan mester indiká nan kada un presis kiko nan mester karga pa nan keda na bida i no haña kastigu di morto.

²⁰ E famianan di Kehat mes no mag drenta e tènt. Si nan bista kai maske ta un ratu so riba e ophetonan ei, nan ta muri.’

Tarea di e levitanan di famia Guershon

²¹ SEÑOR a bisa Moises:

²² ‘Konta e desendientenan di Guershon

²³ entre trinta pa sinkuenta aña segun nan famia i generashon. Inskribí tur ku ta bini na remarke pa hasi e trabou den tènt di enkuentro.

²⁴ Nan mester karga lo siguiente:

²⁵ e pida pañanan di e tènt di enkuentro, esta e paña pa tap'é, e paña di kueru fini ku mester habri riba dje, e kortina na entrada di e tènt di enkuentro,

²⁶ e kortinanan rondó di e plenchi i na entrada di e plenchi ku ta tene e tènt i e altá for di bista, ademas tur e kabuyanan ku ta pertenesé na nan i tur hèrmènt nesesario. Pa e kosnan ei nan ta responsabel.

²⁷ Tur trabou di famia di Guershon, tur nan trabou ora di transportashon, mester bai segun indikashon di Aaron ku su yunan. Nan mester indiká presisamente loke nan mester karga.

²⁸ Esei ta tarea di e generashonnan di famia di Guershon na tènt di enkuentro. Nan trabou ta bou di guia di Itamar, yu di saserdote Aaron.

Tarea di e levitanan di famia di Merari

²⁹ Konta e desendientenan di Merari entre trinta pa sinkuenta aña segun nan famia i generashon.

³⁰ Inskribí tur ku ta bini na remarke pa hasi trabou na tènt di enkuentro.

³¹ Nan tarea ora di transportá e tènt di enkuentro ta: karga e tablanan di e santuario, su balkinan, su pilánan, su pianan,

³² e pilánan rònt di e plenchi ku nan pianan, nan pènchinan ku nan kabuyanan i tur loke ta pertenesé na nan. Esei ta nan trabou. Bisa kada un eksaktamente kiko e mester transportá.

³³ Esei ta tarea di e generashonnan di Merari, henter nan trabou na e tènt di enkuentro bou di guia di Itamar, yu di saserdote Aaron.’

Kantidat di levita ku por a hasi trabou

^34-48 Riba òrdu di SEÑOR, Moises ku Aaron huntu ku e hefenan di komunidat a konta e miembronan di e famia di Kehat, Guershon ku Merari. Despues di e kontamentu nan a traha un lista segun generashon i famia di tur hende hòmber entre trinta pa sinkuenta aña ku tabata bini na remarke pa hasi trabou den tènt di enkuentro. Di e miembronan di famia di Kehat 2750 a bini na remarke, di e miembronan di famia di Guershon 2630 i di famia di Merari 3200. En total 8580 a bini na remarke.

⁴⁹ Tur hende inskribí a haña un tarea serka Moises pa ora ta transportá e tènt di enkuentro, manera SEÑOR a ordená.