Numbernan 36 - Papiamentu Bible 2013

Stipulashon adishonal na e derechi pa yu muhé haña herensia

¹ E kabesnan di famia di Guilead a bin papia ku Moises, ku e hefenan i ku e kabesnan di famia di e israelitanan. Guilead tabata yu hòmber di Makir, yu hòmber di Manase, un di e yu hòmbernan di Jozef.

² Nan a bisa nan: ‘SEÑOR a ordená mi shon pa tira lòt indiká nos nos tereno. Tambe El a ordená mi shon pa duna e pida ku nos famia Selofhat lo a haña, na su yu muhénan.

³ Pero si nan kasa ku un hòmber for di un otro tribu, e ora ei ta kita nan pida tereno for di e propiedat di nos tribu i añadié na esun di e otro tribu.

⁴ I den aña di hubileo nan pida tereno lo pasa definitivamente for di propiedat di nos tribu pa esun di e otro tribu.’

⁵ E ora ei riba òrdu di SEÑOR Moises a ordená e israelitanan lo siguiente: ‘E hendenan akí for di tribu di Jozef tin rason.

⁶ P'esei SEÑOR ta preskribí lo siguiente en relashon ku e yu muhénan di Selofhat: Nan por kasa ku ken ku nan ke, basta ta ku un hende for di nan mes tribu.

⁷ E pida tereno di esun tribu no mag pasa pa un otro tribu. Kada israelita mester sòru pa e pida tereno di famia keda den e mes tribu.

⁸ Kada muhé ku heredá un pida tereno den e pida tereno di un di e tribunan, mester kasa ku un hende di su mes tribu. Asina e israelitanan ta tene e pida tereno di nan famia den poseshon di e tribu.

⁹ Pasobra e pida tereno di esun tribu no mag pasa pa un otro tribu. Kada tribu mester tene su pida tereno huntu.’

¹⁰ E yu muhénan di Selofhat a hasi loke SEÑOR a ordená Moises.

¹¹ Tur e yu muhénan di Selofhat esta Magla, Tirsa, Hogla, Milka i Noa a kasa ku nan primunan parti di tata.

¹² Komo ku nan a kasa den tribu di Manase, yu hòmber di Jozef, nan pida tereno a keda serka e tribu di nan tata.

¹³ Esakinan ta e mandamentunan i reglanan, ku SEÑOR a duna e israelitanan pa medio di Moises, den e kunukunan di Moab kantu di Yordan enfrente di Yériko.