Numbernan 34 - Papiamentu Bible 2013

E fronteranan di e pais Israel

¹ SEÑOR a bisa Moises

² pa ordená e israelitanan lo siguiente: ‘Ora boso yega Kanaan, e pais ei ku boso ta haña komo propiedat lo tin e siguiente fronteranan:

³ E frontera zùit ta kore banda di teritorio di Edom bai desierto di Sin. E ta kuminsá den ost na e punta zùit di Laman Morto.

⁴ Ei e ta lora den direkshon zùit bai Pasashi di Skarpion sigui bai Sin. E ta sali zùit di Kadesh-Barnea sigui bai Hasar-Adar i Asmon.

⁵ Di Asmon e frontera ta lora bai Roi di Egipto bai sali den Laman Mediteráneo.

⁶ E frontera wèst lo ta kosta di e laman akí.

⁷ E frontera nort ta kore asin'akí: Hala un liña for di Laman Mediteráneo bai seru di Hor

⁸ i for di seru di Hor te na e kaminda di bai Hamat. E frontera ta sali na Sedad,

⁹ bai Zifron i kaba na Hasar-Enan. Esei ta e frontera nort.

¹⁰ Hala pa e frontera ost un liña for di Hasar-Enan bai Shefam.

¹¹ Di Shefam e frontera ta kore den direkshon zùit bai Ribla, na parti ost di Ain, i sigui pegá banda di e serunan na parti ost di Lago di Kinerèt.

¹² E ta sigui bai den direkshon zùit banda di Yordan te na Laman Morto.’

¹³ Despues Moises a bisa e israelitanan: ‘Esei awor ta e pais ku boso mester tira lòt parti entre boso. SEÑOR a ordená pa dun'é na nuebe tribu i mitar.

¹⁴ Pasobra e famianan di tribu di Ruben i di tribu di Gad a risibí nan parti kaba; e mitar tribu di Manase tambe a haña su parti kaba.

¹⁵ E dos tribunan i mitar akí ya a haña nan parti akí, na e parti ost di Yordan enfrente di Yériko.’

Lista di e personanan responsabel pa partimentu di e pais

¹⁶ SEÑOR a bisa Moises:

¹⁷ ‘Saserdote Eleazar i Yozue, yu hòmber di Nun, mester parti e pais entre boso.

¹⁸ Nombra ademas un hefe for di kada tribu pa yuda parti e pais.

¹⁹ Ata nan nòmbernan: Kaleb, yu hòmber di Yefune, for di tribu di Huda.

²⁰ Shemuel, yu hòmber di Amihud, for di tribu di Simeon;

²¹ Elidad, yu hòmber di Kislon, for di tribu di Benhamin;

²² Buki, yu hòmber di Yogli, for di tribu di Dan;

²³ Haniel, yu hòmber di Efod, for di tribu di Manase;

²⁴ Kemuel, yu hòmber di Shiftan, for di tribu di Efraim;

²⁵ Elisafan, yu hòmber di Parnak, for di tribu di Zebulon;

²⁶ Paltiel, yu hòmber di Azan, for di tribu di Isakar;

²⁷ Ahihud, yu hòmber di Shelomi, for di tribu di Asher;

²⁸ Pedael, yu hòmber di Amihud, for di tribu di Naftali.’

²⁹ Esakinan ta e hòmbernan ku SEÑOR a ordená pa parti Kanaan entre e israelitanan.