Numbernan 33 - Papiamentu Bible 2013

Resúmen di e biahe di Israel for di Egipto te na Yordan

¹ Aki ta sigui un resúmen di e lugánan kaminda e israelitanan a lanta nan kampamentu, despues ku nan, segun nan divishon di tribu, a sali for di Egipto bou di guia di Moises ku Aaron.

² Riba òrdu di SEÑOR Moises a deskribí nan biahenan di un lugá pa otro. Ata e biahenan ku e lugánan kaminda nan a lanta nan kampamentu.

^3-4 Nan a sali for di Ramses riba e di diessinku dia di e promé luna, manisé di Fiesta di Pésag. Nan a sali bai disididu, miéntras e egipsionan, ku ainda tabata derando nan yu hòmbernan mayó ku SEÑOR a laga mata, tabata para mira nan. Asina SEÑOR a ehekutá huisio riba nan diosnan.

⁵ E israelitanan a sali anto for di Ramses i lanta nan kampamentu na Sukot.

⁶ Nan a sali for di Sukot i lanta nan kampamentu na Etam na rant di desierto.

⁷ Nan a sali for di Etam den direkshon di Pi-Hahirot, ku ta keda pegá ku Baal-Sefon, i lanta nan kampamentu den bisindario di Migdol.

⁸ Nan a sali for di Pi-Hahirot, pasa dor di laman drenta desierto; tres dia largu nan a kana den desierto di Etam i lanta nan kampamentu na Mara.

⁹ Nan a sali for di Mara i yega Elim. Na Elim tabatin diesdos bròn i setenta palma. Ei nan a lanta nan kampamentu.

¹⁰ Nan a sali for di Elim i lanta nan kampamentu na Laman Kòrá.

¹¹ Nan a sali for di Laman Kòrá i lanta nan kampamentu den desierto di Sin.

¹² Nan a sali for di desierto di Sin i lanta nan kampamentu na Dofka.

¹³ Nan a sali for di Dofka i lanta nan kampamentu na Alush.

¹⁴ Nan a sali for di Alush i lanta nan kampamentu na Refidim. Aya e pueblo no tabatin awa pa bebe.

¹⁵ Despues di Refidim nan a lanta nan kampamentu den desierto di Sinai

^16-37 i kaba na e siguiente lugánan: Kibrot-Hataawa, Haserot, Ritma, Rimon-Pèrès, Libna, Risa, Kehelata, Shèfèr, Harada, Makhelot, Tahat, Tèrag, Mitka, Hashmona, Moserot, Bene-Yaakan, Hor-Haguidgad, Yotbata, Abrona, Esion-Gèbèr i Kadesh den desierto di Sin. Na Kadesh e israelitanan a lanta nan kampamentu serka di e seru di Hor, na frontera di Edom.

^38-39 Riba òrdu di SEÑOR saserdote Aaron a subi seru di Hor. Aya el a muri na edat di 123 aña riba e promé dia di e di sinku luna den e di kuarenta aña despues ku nan a sali for di Egipto.

⁴⁰ Tabata den e tempu ei ku e rei kanaanita di Arad, den desierto di Neguèb, a tende ku e israelitanan tabata biniendo.

^41-49 Entre seru di Hor i e vaye di Moab e israelitanan a lanta nan kampamentu na e siguiente lugánan: Salmona, Punon, Obot, Iye-Haabarim den teritorio di Moab, Dibon-Gad, Almon-Diblataim, e serunan di Abarim serka di seru di Nebo i finalmente vaye di Moab kantu di Yordan enfrente di Yériko, entre Bet-Haishimot i Abel-Hashitim.

Instrukshon kon tuma e pais den poseshon

⁵⁰ Den vaye di Moab kantu di Yordan enfrente di Yériko, SEÑOR a duna Moises òrdu

⁵¹ pa bisa e israelitanan lo siguiente: ‘Ora boso krusa Yordan i yega den pais Kanaan,

⁵² kore ku tur habitante for di e pais. Destruí tur imágen di dios falsu trahá di piedra i di metal i hasi tur seritu di sakrifisio pareu ku suela.

⁵³ Tuma e pais pa boso i bai biba aya, pasobra mi ta duna boso e pa boso keda kuné.

⁵⁴ Tira lòt parti e pais den e famianan, un pida tera grandi pa un famia grandi i un pida tera chikitu pa un famia chikitu. Kada hende ta haña su tera komo propiedat, na e lugá ku e lòt indiká. Partié asina den e tribunan.

⁵⁵ Si sinembargo boso no kore ku e habitantenan, esnan ku sobrebibí lo bira un sumpiña den boso wowo i un blòki na boso pia. Den boso mes pais nan lo molestiá boso.

⁵⁶ E ora ei lo Mi hasi ku boso, loke Mi ker a hasi ku nan.’