Numbernan 23 - Papiamentu Bible 2013

¹ Bileam a bisa Balak: ‘Konstruí shete altá pa mi aki i prepará shete toro ku shete chubatu di karné pa un sakrifisio.’

² Balak a hasi loke Bileam a mand'é. Huntu ku Bileam el a ofresé un toro ku un chubatu di karné riba kada altá.

³ Despues Bileam a bisa Balak: ‘Keda para aki serka e sakrifisionan, miéntras ami ta bai. Podisé SEÑOR ke revelá su mes na mi. E ora ei lo mi bisa bo, kiko El a bisa mi.’ Bileam a subi un kabes di seru bashí.

⁴ Ei Dios a revelá su mes n'e. Bileam a bisa SEÑOR: ‘Mi a laga konstruí shete altá i a laga ofresé un toro ku un chubatu di karné komo sakrifisio riba kada un.’

⁵ SEÑOR a ordená Bileam loke e mester bisa i mand'é bèk.

⁶ Balak ku e hefenan di Moab tabata pará ketu bai serka e sakrifisionan ora Bileam a yega bèk.

⁷ E ora ei Bileam a hasi e siguiente deklarashon: ‘Balak a laga buska mi na Aram, for di e serunan di den oriente rei di Moab a laga buska mi. “Bini,” el a bisa, “plega e pueblo di Yakob pa mi, bin maldishoná e Israel ei.”

⁸ Pero kon mi por plega esnan ku Dios no a plega? Kon mi por maldishoná esnan ku SEÑOR no a maldishoná?

⁹ For di riba tòp di e barankanan mi ta mir'é, mi ta wak e for di riba e serunan, un pueblo, ku no ta biba serka e otro pueblonan, ku no ta konsiderá su mes un di nan.

¹⁰ Ken por konta e bola di santu ei, e pueblo ei di Yakob, ken por kalkulá maske ta un kuartu di Israel? Mare un dia mi por muri, manera e hustunan akí lo muri, mare mi fin por ta manera di nan.’

¹¹ Ora Bileam a kaba di papia Balak a bis'é: ‘Ta kiko e kos ku bo a hasi ei? Mi a laga bo bini pa bo maldishoná mi enemigunan, ma na lugá di hasi esei bo a bendishoná nan!’

¹² Bileam a kontestá: ‘N' ta solamente loke SEÑOR pone den mi boka mi por bisa?’

¹³ Riba esaki Balak a kontest'é: ‘Ban ku mi un otro lugá, for di kaminda bo por mira nan; no henter e pueblo wèl, pero tòg un parti; i for di e lugá ei bo mester maldishoná nan.’

¹⁴ El a bai kuné na un plèki riba kabes di Pisga kaminda por wak te leu; ei Balak a bolbe konstruí shete altá i a ofresé un toro ku un chubatu di karné riba kada altá.

¹⁵ E ora ei Bileam a bisa Balak: ‘Aki tambe bo mester keda para serka e sakrifisionan, miéntras ami ta bai warda aya riba un revelashon di SEÑOR.’

¹⁶ SEÑOR a revelá su mes na Bileam, bis'é kiko e mester bai bisa i mand'é bèk.

¹⁷ Ora Bileam a bolbe, Balak ku e hefenan tabata pará ketu bai serka e sakrifisionan. Balak a puntr'é: ‘Kiko SEÑOR a bisa?’

¹⁸ E ora ei Bileam a hasi e siguiente deklarashon: ‘Lanta para Balak, skucha, tende mi, yu di Sipor.

¹⁹ Dios no ta manera hende, E no sa gaña, E no ta manera yu di hende, E no ta haña duele di loke E bisa. Lo E bisa un kos, keda sin hasié? Primintí algu i keda sin kumpli kuné?

²⁰ El a duna mi òrdu pa bendishoná i si El a bendishoná, ami no por kita e bendishon.

²¹ Ningun desgrasia no ta menasá pueblo di Yakob. E israelitanan no tin nodi di tin miedu di desaster: SEÑOR, nan Dios, ta protegé nan; E ta nan rei famoso.

²² Dios, ku a saka nan for di Egipto, ta pa nan loke kachu ta pa un búfalo.

²³ Huramentu no tin forsa kontra pueblo di Yakob, bruha no ta yuda kontra Israel. Awor ta tempu pa bisa di pueblo di Yakob, di Israel: “Wak kiko Dios a hasi pa nan!”

²⁴ Ata un pueblo aki ku ta lanta para manera un leon. Ku no ta sosegá promé ku e devorá loke el a kapturá i bebe sanger di su víktimanan.’

²⁵ E ora ei Balak a bisa Bileam: ‘Stòp! No maldishoná nan, ni bendishoná nan.’

²⁶ Bileam a kontest'é: ‘Mi no a bisa bo ku lo mi hasi tur loke SEÑOR ordená mi?’

²⁷ Balak a bisa Bileam: ‘Ban, mi ta bai ku bo un otro kaminda. Podisé Dios ta haña ta bon pa bo maldishoná e pueblo for di einan pa mi.’

²⁸ Balak a bai ku Bileam riba kabes di seru di Peor, ku bista riba desierto.

²⁹ Bileam a bisa Balak: ‘Konstruí aki tambe shete altá i prepará shete toro ku shete chubatu di karné pa un sakrifisio.’

³⁰ Balak a hasi loke Bileam a pidi i a ofresé un toro ku un chubatu di karné riba kada altá.