Numbernan 14 - Papiamentu Bible 2013

Rebeldia di pueblo

¹ E ora ei henter e komunidat a kuminsá grita duru i nan a keda keha henter anochi.

² Tur e israelitanan a lanta kontra Moises i Aaron. Nan a bisa nan: ‘Mare nos a muri na Egipto òf aki den desierto mes!

³ Pakiko SEÑOR ke hiba nos e pais ei? Nan lo mata nos ku spada i kohe nos muhénan ku nos yunan prezu. No ta mihó nos bai Egipto bèk?’

⁴ I nan tabata bisa otro: ‘Laga nos mes skohe un hefe, bai Egipto bèk!’

⁵ E ora ei Moises ku Aaron a bùig te na suela den presensia di henter komunidat.

⁶ Yozue, yu di Nun, i Kaleb, yu di Yefune, dos di e hòmbernan ku a bai eksplorá Kanaan, a sker nan paña di fèrdrit.

⁷ Nan a bisa henter e komunidat di israelita: ‘E pais ku nos a eksplorá ta demasiado bon.

⁸ Si SEÑOR ke nos bon, E ta hiba nos e pais akí ku ta mana lechi i miel, i duna nos e.

⁹ Pero no lanta kontra SEÑOR, ni tene miedu di e poblashon di e pais ei, pasobra nos lo derotá nan den un fregá di wowo. Nan no tin ningun protekshon, pero nos tin SEÑOR na nos banda. No tene miedu di nan!’

¹⁰ Ora e pueblo ker a tira nan ku piedra mata, SEÑOR su gran splendor a aparesé den tènt di enkuentro den bista di tur e israelitanan.

Moises ta pidi pordon pa e pueblo

¹¹ SEÑOR a bisa Moises: ‘Kuantu tempu mas e pueblo akí lo despresiá Mi? Kuantu tempu mas nan lo nenga di konfia riba Mi apesar di tur e señalnan milagroso ku Mi hasi pa nan?

¹² P'esei lo Mi kastigá nan ku pèst, kaba ku nan! Bo desendientenan lo bira un nashon mas grandi i mas fuerte ku esaki!’

^13-14 Pero Moises a bisa SEÑOR: ‘E egipsionan lo tende e kos ei i konta e habitantenan di Kanaan. No t'Abo pa bo poder a laga e pueblo akí sali for di Egipto? E habitantenan di e pais akí a tende kaba ku Abo, SEÑOR, ta huntu ku e pueblo akí; ku por a nota bon kla ku Bo a aparesé; ku bo nubia ta riba nan; ku di dia Bo ta bai nan dilanti den un pilá di nubia i anochi den un pilá di kandela.

¹⁵ Si Bo mata e pueblo akí den un solo tiru, e nashonnan ku a tende di bo fama lo bisa:

¹⁶ SEÑOR no tabata kapas na hiba e pueblo ei e pais ku El a primintí nan. P'esei El a mata nan den desierto.’

¹⁷ Moises a sigui bisa: ‘Demostrá bo gran poder awor, Señor. Aktua di akuerdo ku loke Bo a bisa:

¹⁸ “Ami, SEÑOR, tin pasenshi i ta yen di bondat. Mi ta pordoná piká i maldat, pero Mi no ta keda sin kastigá. Ora un hende peka, Mi ta kastigá su yunan, su ñetunan i bisañetunan tambe.”

¹⁹ SEÑOR, pordon! Den bo gran bondat pordoná e pueblo akí su maldat, manera semper Bo a hasi for di dia nan a sali for di Egipto.’

Kontesta di SEÑOR: pordon i kastigu

²⁰ E ora ei SEÑOR a bisa: ‘Mi ta pordoná nan manera bo a pidi.

²¹ Pero mes sigur ku Mi ta biba i mi gran splendor lo yena henter mundu,

^22-23 mes sigur ningun di nan lo no drenta e pais ku Mi a primintí nan antepasadonan solemnemente. Nan a mira mi gran splendor i e señalnan milagroso ku Mi a hasi na Egipto i den desierto. Sinembargo ya nan a pone Mi dies bia na prueba i nan no a tende di Mi. Ningun di nan ku a despresiá Mi, no ta drenta e pais primintí.

²⁴ Pero pasobra mi sirbidó Kaleb tabatin otro pensamentu i a keda fiel na Mi, lo Mi hib'é e pais ku el a eksplorá i su desendientenan lo keda ku e pais.

²⁵ E amalekitanan ku e kanaanitanan ta biba den e vaye. Bira bèk mañan i bolbe drenta e desierto den direkshon di Laman Kòrá.’

²⁶ SEÑOR a bisa Moises ku Aaron:

²⁷ ‘Kuantu tempu mas e pueblo malbado akí ta keda lanta kontra Mi? Mi a tende kon nan ta lanta kontra Mi.

²⁸ Bisa nan: “Asina SEÑOR ta bisa: Mes sigur ku Mi ta biba, mes sigur lo Mi hasi ku boso manera Mi a tende boso bisa.

²⁹ Den e desierto akí kadaver di tur esnan ku a lanta kontra Mi lo keda bentá, di tur esnan registrá, ke men di tur esnan ku tin binti aña bai ariba.

³⁰ Ningun di boso lo no drenta e pais ku Mi a primintí boso solemnemente komo lugá pa keda biba, ku eksepshon di Kaleb, yu di Yefune, i Yozue, yu di Nun.

³¹ Lo Mi hiba boso yunan, ku segun boso nan lo kohe prezu aya. Ta nan lo siña konosé e pais ku boso a despresiá.

³² Boso kadaver lo keda bentá den e desierto akí

³³ i kuarenta aña boso yu hòmbernan lo keda dualu den desierto pasa kastigu pa boso infieldat, te ora boso kadavernan kaba na nada.

³⁴ Kuarenta dia largu boso a eksplorá Kanaan, p'esei awor boso mester pasa kastigu kuarenta aña pa boso maldat, un aña pa kada dia. E ora ei boso lo sa, kiko ta nifiká: tin Ami, SEÑOR, kontra boso.

³⁵ Ami, SEÑOR, a papia, lo Mi hasi esaki sigur ku henter e pueblo malbado akí, ku ta lanta kontra Mi. Den e desierto akí nan lo haña nan fin, i muri einan.” ’

³⁶ I e hòmbernan ku Moises a manda bai eksplorá e pais, ku ora nan a bini bèk a pone henter e komunidat lanta ku Moises plamando tur sorto di rumor riba e pais,

³⁷ e plamadónan di tur sorto di rumornan ei SEÑOR a laga ku nan a muri un morto diripiente.

³⁸ Di tur e hòmbernan ku a sali bai eksplorá e pais ta Yozue, yu di Nun, ku Kaleb, yu di Yefune, so a keda na bida.

E pueblo ta desobedesidu atrobe

³⁹ Moises a pasa e palabranan di SEÑOR pa tur e israelitanan i e pueblo a keda mashá abatí.

⁴⁰ E siguiente mainta trempan nan ker a drenta e region di seru. Nan a bisa: ‘Nos a peka. Pero awor nos ta kla pará pa sali bai e lugá ku SEÑOR a primintí.’

⁴¹ E ora ei Moises a bisa: ‘Di kon boso ta bai kontra òrdu di SEÑOR? Boso lo no logra.

⁴² No bai, pasobra SEÑOR no ta na boso banda. E enemigu lo derotá boso.

⁴³ Aya dilanti e amalekitanan ku e kanaanitanan ta pará kla pa bringa ku boso, mata boso. I komo boso a bandoná SEÑOR, ya E no ta ku boso mas.’

⁴⁴ Kaprichoso manera nan tabata, nan a subi seru tòg, pero e arka di aliansa i Moises no a sali for di kampamentu.

⁴⁵ E amalekitanan ku e kanaanitanan ku tabata biba den region di seru, a derotá nan i a persiguí nan te na Horma.