Numbernan 11 - Papiamentu Bible 2013

E pueblo na Tabera

¹ A sosodé awor ku pueblo tabata keha kontra SEÑOR ku nan tabata pasa malu. Ora SEÑOR a tende e kos ei, El a drenta un rabia, manda un kandela ku a plama na rant di e kampamentu.

² E pueblo a pidi Moises pa yuda nan. Moises a resa na SEÑOR i e kandela a paga.

³ A yama e lugá akí Tabera, pasobra kandela di SEÑOR a kima kontra nan.

Loke a pasa na Kibrot-Hataawa

⁴ E strañeronan di diferente orígen ku tabata biaha ku e israelitanan, a haña un gana iresistibel di kome karni. E israelitanan tambe a kuminsá keha atrobe. Nan tabata bisa: ‘Mare nos tabatin karni pa nos kome!

⁵ Na Egipto nos tabata pasa bon. Aya nos tabata haña piská pòrnada. Kòrda e kònkòmber, milon, prei, siboyo i konofló ku nos tabata haña aya pa kome.

⁶ Aki nos no tin nada di e kosnan ei, nos ta seka muri aki. Nos no ke mira mana mas ku wowo.’

⁷ E mana tabatin forma di simia di silantro i tabata blanku, meskos ku e gòm di palu ku holó dushi.

^8-9 Anochi mana tabata kai huntu ku serena den e kampamentu. Mainta e pueblo tabata piki mana tur kaminda. Nan tabata mul'é ku un mulina di man òf batié fini den fènsu. Despues tabata kushin'é den wea i traha kuki di dje, ku tabata smak manera kuki hasá den zeta.

¹⁰ Moises tabata tende kon henter pueblo tabata sinta keha dilanti di nan tènt. SEÑOR a bira mashá rabiá. I Moises ku a kuminsá fada,

¹¹ a bisa SEÑOR: ‘Di kon bo ta trata mi asina malu? Aparentemente ta bon Bo no ke mi ku Bo a pone responsabilidat di henter e pueblo akí riba mi lomba.

¹² Ta parse manera t'ami tabata na estado di henter e pueblo ei i ku t'ami a pone nan na mundu, ku Bo ta bisa mi: “Karga nan na pechu manera un yaya ta karga un yuchi” i ku Bo ta ordená mi hiba nan e pais ku Bo a primintí nan antepasadonan solemnemente.

¹³ Unda mi ta saka karni pa henter e pueblo haña? Nan ta keha serka mi: “Duna nos karni pa nos kome!”

¹⁴ Mi so no por karga responsabilidat pa henter e pueblo ei. E responsabilidat ta muchu grandi pa mi.

¹⁵ Si t'asina Bo ke sigui trata mi, mihó Bo laga mi muri, si ta di bèrdat Bo ke mi bon. Ya mi no ta haña mi den tantu difikultat asina.’

¹⁶ SEÑOR a kontestá Moises: ‘Yama setenta lider di e ansianonan di pueblo huntu i bini ku nan na entrada di tènt di enkuentro.

¹⁷ E ora ei Mi ta baha bin papia ku bo i duna nan parti di e spiritu ku Mi a duna bo. Huntu ku bo nan lo karga responsabilidat pa e pueblo, di manera ku bo so no tin mester di karg'é.

¹⁸ Bisa e pueblo: Sòru di purifiká boso pa mañan; e ora ei boso ta haña karni pa kome. Boso no a keha tòg kontra SEÑOR: “Ken por yuda nos ku karni? Esta bon nos tabata pasa na Egipto.” SEÑOR lo duna boso karni i boso lo kome!

¹⁹ No un dia so, ni dos, ni sinku, ni dies, ni binti dia,

²⁰ pero henter un luna largu te ora boso harta bira malu di e karni. Pasobra ounke SEÑOR ta serka boso, boso a despresi'É dor di bai keha kontra djE: “Ma ta pakiko nos a sali for di Egipto?” ’

²¹ Moises a bisa: ‘E pueblo ku mi ta biba serka dje ta konsistí di 600.000 hende riba pia, anto Bo ta bisa: “Lo Mi duna nan karni i pone nan kome karni henter un luna largu.”

²² Maske mata tur karné ku tur baka, ainda nan lo no tin sufisiente. Maske piska tur piská for di den laman pa nan, ainda nan lo no tin sufisiente.’

²³ Pero SEÑOR a bisa Moises: ‘Ami, SEÑOR, no ta basta poderoso antó? Lo bo mira ku enberdat loke Mi a bisa ta sosodé, sí òf nò!’

²⁴ Moises a sali pafó i a konta e pueblo loke SEÑOR a bisa. El a yama setenta di e ansianonan di pueblo huntu i a pone nan para rondó di e tènt.

²⁵ E ora ei SEÑOR a baha den un nubia, papia ku Moises i a pone un parti di e spiritu ku El a dun'é riba nan. Ora e spiritu a baha riba nan, nan a profetisá, despues esaki no a sosodé mas.

²⁶ Dos di e setenta ansianonan ku tabata riba lista, Eldad ku Medad, a keda atras den e kampamentu. E spiritu a baha riba nan tambe i nan a profetisá den kampamentu.

²⁷ Un mucha hòmber a kore purá bai konta Moises, el a bisa: ‘Eldad ku Medad a profetisá den kampamentu.’

²⁸ Yozue, yu di Nun, ku for di yòn a drenta den servisio serka Moises, a bisa riba esei: ‘Shon, taha nan di hasi e kos ei!’

²⁹ Moises a bis'é: ‘Pakiko bo ta tuma parti pa mi? Mare ta henter e pueblo di SEÑOR a profetisá i mare ta riba nan tur SEÑOR a pone su spiritu baha.’

³⁰ Despues Moises ku e ansianonan a bai e kampamentu bèk.

³¹ SEÑOR a laga ku for di direkshon di laman, un bientu a lanta ku a trese sloke laga nan kai den e kampamentu. Den tur direkshon rondó di e kampamentu, riba un distansia di un dia di kana nan tabata bentá riba otro kasi un meter altu.

³² E pueblo a piki sloke henter e dia i henter e anochi ei i tambe e dia siguiente; kada hende a piki por lo ménos un par di mil kilo. Nan a habri nan abou rondó di e kampamentu pa nan seka.

³³ Apénas nan a kuminsá kome ku rabia di SEÑOR a lanta kontra e pueblo. El a mata hopi di nan.

³⁴ A yama e lugá ei Kibrot-Hataawa, komo t'ei a dera e hendenan ku tabatin tantu deseo di kome karni.

³⁵ Di Kibrot-Hataawa e pueblo a sigui pa Haserot, kaminda nan a lanta nan kampamentu.