Nehemías 11 - Papiamentu Bible 2013

Lista di habitante di Herusalèm

¹ E lidernan di pueblo a bai biba na Herusalèm. Pero a tira lòt entre e otro hendenan di pueblo pa indiká kua di kada dies famia ta bai biba na e siudat santu Herusalèm; e otro nuebenan por a keda biba den e otro siudatnan.

² E pueblo a gaba esnan ku boluntariamente a bai biba na Herusalèm.

³ Den e otro siudatnan di Huda tabatin tambe, aparte di e otro israelitanan: saserdote, levita, sirbiente di tèmpel i desendiente di e sirbientenan di Salomon. Kada hende tabatin su mes pida tereno den su mes siudat. Aki ta sigui nòmber di e hefenan di provinsia ku tabata biba na Herusalèm.

⁴ Di tribu di Huda: Ataya, yu di Uzías. E tabata desendiente di Pèrès, yu di Huda, pa parti di su antepasadonan Zekarías, Amarías, Shefatías i Mahalalel.

⁵ Maasea, yu hòmber di Barug. E tabata desendiente di Shèla, yu di Huda pa parti di su antepasadonan Kòl-Hozè, Hazaías, Adaías, Yoyarib i Zekarías.

⁶ E desendientenan di Pèrès ku tabata biba na Herusalèm tabata na tur 468 hòmber balente.

⁷ Di tribu di Benhamin: Salu, yu di Meshulam. E tabata desendiente di Yeshaías pa parti di su antepasadonan Yoed, Pedaías, Kolaías, Maasea i Itiel.

⁸ Tabatin tambe Gabai, Salai. En total nan tabata 928 hende.

⁹ Yoel, yu di Zikri, tabata nan lider. Huda, yu di Hasnua, tabata supkomandante.

¹⁰ Di e saserdotenan: Yedaías, yu di Yoyarib i ñetu di Yakin.

¹¹ Seraías tabata hefe prinsipal, enkargá ku kuido di tèmpel; e tabata desendiente di Ahitub, pa parti di su antepasadonan Hilkías, Meshulam, Sadok i Merayot.

¹² Huntu ku e saserdotenan akí tabatin 822 kolega ku tabata hasi sirbishi den tèmpel. Tabatin tambe Adaías, yu di Yeroham. E tabata desendiente di Malkías pa parti di su antepasadonan Pelalías, Amsi, Zekarías i Pashur.

¹³ Entre e miembronan di su famia tabatin 242 kabes di famia. Amasai, yu di Azarel. E tabata desendiente di Imer pa parti di su antepasadonan Agzai i Meshilemot.

¹⁴ Tabatin tambe 128 otro saserdote, tur tabata hòmber balente. Zabdiel, yu di Hagdolim, tabata nan lider.

¹⁵ Di e levitanan: Shemaías; e tabata desendiente di Buni pa parti di su antepasadonan Hashub, Azrikam i Hashabías.

¹⁶ Shabtai i Yozabad, kabesnan di famia, ku tabata lider di tur esnan enkargá ku e trabounan pafó di tèmpel di Dios.

¹⁷ Matanías, yu hòmber di Mikas i ñetu di Zabdi, un desendiente di Asaf. E tabata dirigí e kanto di alabansa i na ora di orashon é tabata kuminsá ku e gradisimentu. Bakbukías, famia di Matanías, tabata su remplasante. Tambe tabatin Abda, yu di Shamúa i ñetu di Galal, un desendiente di Yedutun.

¹⁸ Na tur e levitanan den e siudat santu tabata 284.

¹⁹ Guardianan na entrada di tèmpel tabata Akub, Talmon i algun famia di nan, 172 hende en total.

²⁰ Tur e otro israelitanan, ku saserdote i levita tambe aden, tabata biba riba nan mes tereno, nan patrimonio, den e otro siudatnan di Huda.

²¹ E sirbientenan di tèmpel, ku tabata bou di guia di Siha i Guishpa, tabata biba riba e seritu Ofèl na Herusalèm.

²² Hefe di e levitanan na Herusalèm tabata Uzi, yu di Bani. E tabata desendiente di Mikas pa parti di su antepasadonan Hashabías i Matanías. E tabata pertenesé na famia di Asaf, e famia ku tabata perkurá pa e kanto durante sirbishi den tèmpel.

²³ Un dekreto real tabata regla e sirbishi diario di e kantornan den tèmpel.

²⁴ Petaías, yu di Meshezabel, un desendiente di Zèrag, yu di Huda, tabata representá pueblo israelita serka rei di Persia.

E pueblo hudiu pafó di Herusalèm

²⁵ Esaki ta e siudatnan pafó di Herusalèm kaminda esnan di tribu di Huda tabata biba: Kiriat-Arba, Dibon, Yekabseel i e pueblonan i e pueblesitonan ku tabata rondoná nan;

²⁶ Yeshua, Molada, Bet-Pèlèt,

²⁷ Hasar-Shual, Beer-Shèba ku su pueblonan,

²⁸ Siklag, Mekona ku su pueblonan,

²⁹ En-Rimon, Sora, Yarmut,

³⁰ Zanoag i Adulam ku nan pueblonan, Lakish ku su kunukunan i Azeka ku e pueblonan ku tabata rondon'é. Asina ta ku nan a establesé nan mes for di Beer-Shèba parti zùit te na vaye di Hinom parti nort.

³¹ Esnan di tribu di Benhamin tabata biba na Gueba, Mikmas, Aya, Betel i su pueblonan,

³² tambe Anatot, Nob i Anaías,

³³ Hasor, Rama i Guitaim,

³⁴ Hadid, Seboim, Nebalat,

³⁵ Lod, Ono i den Vaye di Artesano.

³⁶ Algun grupo di levita for di region di Huda tambe a bai biba den teritorio di Benhamin.