Nahum 2 - Papiamentu Bible 2013

Atake kontra Nínive

¹ Un destruktor ta ranka sali kontra bo, Nínive. Pone warda riba bo murayanan di defensa! Vigilá e kaminda ku ta drenta siudat! Prepará bo mes pa bataya, faha bo lomba!

² Pasobra SEÑOR ta restourá grandesa di Yakob, sí, gloria di Israel E ta restourá, ounke enemigunan di Israel a destrosá e pais i kap su matanan di wendrùif bash'abou.

³ Eskudo di sòldánan enemigu ta kòrá ifèrf. Koló kòrá bibu nan pañanan ta. Na punto pa ataká Nínive, nan garoshinan di guera ta bria ku splendor di kandela i nan ta zuai ku lansa.

⁴ Den kayanan garoshinan di guera ta kore pa loko. Nan ta skuer bai bini riba plenchinan di siudat. Nan ta bria meskos ku flambeu sendé, ta bula djaki p'aya manera welek.

⁵ Nínive ta manda yama su komandantenan. Den nan ansha nan ta trompeká na kaminda; nan ta kore bai na e muraya di siudat, pero ya e enemigu a prepará su arma pa ataká muraya.

⁶ Portanan na e riu ta bula habri; e palasio ta tambaliá.

⁷ Desishon a kai: Lo deshonrá Nínive i hib'é den eksilio. Su sirbidónan ta keha manera palomba ku doló i nan ta bati riba nan pechu di tristesa.

⁸ Nínive ta manera dam ku ta pèrdè tur su awa. Tin gritu: ‘Para! Para!’ Pero niun hende no ta bira bèk.

⁹ Konkistadónan, kohe oro, bai ku plata! No tin límite na e kantidat, e siudat ta pimpá di tur sorto di tesoro.

¹⁰ Desaster, destrukshon, desolashon! Kurasonnan ta krem, pianan ta tembla. Kurpanan ta pèrdè tur nan forsa i karanan ta kambia koló.

¹¹ Ki' a para di e siudat, kueba di leon, kaminda e yunan di leon tabata haña kuminda i tantu e leon machu, komo esun muhé huntu ku nan yunan por a kana rònt trankil sin nada stroba nan?

¹² E leon a mata bestia pa su yunan kome. El a kibra garganta di su víktimanan pa e leon muhénan haña. El a yena su hòl ku karni, su kueba el a stiwa ku bestia habraká.

¹³ SEÑOR Soberano ta deklará: ‘Skucha! Awor Mi ta bai lanta kontra bo. Lo Mi laga bo garoshinan di guera kima bira shinishi. Bo leonnan hóben lo muri den guera. Lo Mi bari for di kara di mundu tur loke bo a hòrta. Niun hende lo no skucha bo mensaheronan mas.’