Mateo 26 - Papiamentu Bible 2013

Kòmplòt pa mata Hesus

¹ Ora Hesus a kaba di papia tur e kosnan akí, El a bisa su disipelnan:

² ‘Boso sa ku aki dos dia ta fiesta di Pésag. E ora ei ta entregá Yu di hende pa nan krusifik'É.’

³ Den e tempu ei e saserdotenan importante i e ansianonan a reuní den palasio di gransaserdote Kaifas.

⁴ Nan a bai di akuerdo pa kohe Hesus prezu na un manera astuto i mat'É.

⁵ Nan a papia ku otro pa no hasi esaki durante e dianan di fiesta pa e pueblo no rebeldiá.

Un muhé ta basha perfume riba Hesus

⁶ Hesus tabata na Betania na kas di Simon, e leproso.

⁷ Miéntras E tabata sinta kome, un muhé a drenta ku un butishi yená ku zeta perfumá karu i el a bash'é riba Hesus su kabes.

⁸ Ora su disipelnan a mira loke a pasa, nan a rabia i bisa: ‘Pakiko mester dispidí?

⁹ Por a bend'é pa un bon kantidat di plaka i duna hende pober e sèn.’

¹⁰ Hesus a ripará kiko tabata pasa i El a bisa: ‘Pakiko boso ta molestiá e señora? El a hasi un bon obra pa Mi.

¹¹ Hende pober boso lo tin semper serka boso, ma Ami sí boso lo no tin semper!

¹² Ora el a hunta mi kurpa ku zeta, el a hasié komo preparashon pa mi entiero.

¹³ Mi ta sigurá boso: na tur lugá na mundu kaminda prediká e bon notisia akí, lo menshoná loke e muhé akí a hasi i lo sigui rekord'é.’

Hudas ta disidí di traishoná Hesus

¹⁴ E ora ei un di e diesdos apòstelnan, yamá Hudas Iskariot, a bai serka e saserdotenan importante i bisa nan:

¹⁵ ‘Kuantu boso ta duna mi pa entreg'É na boso?’ Nan a pag'é trinta moneda di plata.

¹⁶ For di e momento ei Hudas a kuminsá buska un momento oportuno pa entregá Hesus.

Hesus ta kompartí sena di Pésag ku su disipelnan

¹⁷ Riba promé dia di fiesta di Pan sin Zürdeg, Hesus su disipelnan a bin puntr'É: ‘Unda Bo ke nos prepará sena di Pésag pa Bo kome?’

¹⁸ Hesus a bisa nan: ‘Drenta siudat, bai serka tal i tal persona i bis'é: “Maestro ta bisa: Mi tempu a yega, serka bo mi ta tene sena di Pésag ku mi disipelnan.” ’

¹⁹ E disipelnan a hasi manera Hesus a manda nan i a prepará e sena di Pésag.

²⁰ Ora a bira nochi, Hesus i su diesdos disipelnan a sinta kome.

²¹ Miéntras nan tabata kome, Hesus a bisa: ‘Mi ta sigurá boso: ún di boso lo traishoná Mi.’

²² E disipelnan a bira mashá fèrdrit i un tras di otro a kuminsá bis'É: ‘N' t'ami sí, no Señor!’

²³ Ma Hesus a kontestá nan: ‘Esun ku dòp su pan den skalchi huntu ku Mi, lo traishoná Mi.

²⁴ Sí, manera ta skibí den Skritura, Yu di hende mester bai, ma ai di e hende ku traishon'É! Ta mihó pa e hende ei, si nunka e no a nase mes!’

²⁵ Hudas, esun ku a traishon'É, a puntr'É: ‘Por t'ami, Maestro?’ Hesus a bis'é: ‘Manera bo di!’

Sena di Señor

²⁶ Miéntras nan tabata kome, Hesus a kohe pan; El a gradisí Dios, kibra e pan i duna su disipelnan. ‘Tuma kome, esaki ta mi kurpa,’ El a bisa.

²⁷ Despues El a kohe un kopa di biña, yama Dios danki pa e kopa, pas'é pa nan i bisa: ‘Boso tur bebe for di dje.

²⁸ Esaki ta mi sanger, ku ta konfirmá e aliansa i ku Mi ta drama pa hopi hende, pa pordon di piká.

²⁹ Mi ta bisa boso: for di awe, lo Mi no bebe biña mas, te dia Mi bebe biña nobo ku boso den reino di mi Tata.’

³⁰ Despues di a kanta himno nan a sali pa Seru di Oleifi.

Hesus ta bisa delantá ku Pedro lo neng'É

³¹ E ora ei Hesus a bisa su disipelnan: ‘Awe nochi mes, boso lo pèrdè fe den Mi i bandoná Mi! Lo sosodé manera Dios ta bisa den Skritura: Lo Mi mata e wardadó; i e karnénan lo plama for di otro.

³² Ma despues ku Mi lanta for di morto, lo Mi bai Galilea boso dilanti.’

³³ Pedro a kontestá: ‘Maske tur sobrá pèrdè fe den Bo i bandoná Bo, ami sí lo no hasié.’

³⁴ Hesus a kontest'é: ‘Mi ta sigurá bo: awe anochi mes, promé ku gai kanta, ya lo bo a nenga tres be ku bo konosé Mi.’

³⁵ Ma Pedro a bisa: ‘Maske mi mester muri huntu ku Bo, nenga sí lo mi no nenga bo!’ Tur e otro disipelnan tambe tabata bisa tipo di kosnan asina.

Hesus ta resa den hòfi di Getsémani

³⁶ Hesus ku su disipelnan a yega un lugá ku yama Getsémani, i El a bisa nan: ‘Keda sinta akinan, turesten Mi ta bai resa aya banda.’

³⁷ El a bai ku Pedro i e dos yunan di Zebedeo; El a kuminsá bira tristu i intrankil.

³⁸ El a bisa nan: ‘Mi ta sinti un tristesa asina grandi den mi kurason ku Mi por muri; keda aki, ma keda alerta huntu ku Mi.’

³⁹ Hesus a bai un tiki mas leu i a tira su kurpa abou. El a bisa: ‘Mi Tata! Si ta posibel, laga e kopa di sufrimentu akí pasa bai. Pero no loke Ami ke, ma loke Abo ke.’

⁴⁰ El a bai bèk serka e disipelnan i a haña nan drumí na soño. El a bisa Pedro: ‘Boso no por a keda ni sikiera un ora lantá, huntu ku Mi?

⁴¹ Boso mester keda lantá i resa pa boso no kai den tentashon. Spiritu di hende tin boluntat sí, ma ta hende mes ta débil.’

⁴² Hesus a bolbe bai hasi orashon i a bisa: ‘Mi Tata, si e kopa akí no por pasa bai sin Mi beb'é, ku sosodé segun bo boluntat.’

⁴³ Ora El a bini bèk, El a bolbe haña nan na soño, pasobra nan wowo a bira pisá.

⁴⁴ El a bai bèk bai resa atrobe i a hasi e mesun orashon pa di tres be.

⁴⁵ Despues El a bai serka su disipelnan i bisa nan: ‘Sigui drumi i sosegá numa. Ata e ora ta serka! Ta bai entregá Yu di hende den man di pekadó.

⁴⁶ Lanta ariba, laga nos ban; esun ku a traishoná Mi, ta serka di yega.’

Nan ta kohe Hesus prezu

⁴⁷ Segun Hesus tabata papia, Hudas, un di e diesdos disipelnan, a yega. E tabata den kompania di un grupo grandi di hende ku e ansiano i saserdotenan importante a manda. E hendenan tabata armá ku sabla i palu.

⁴⁸ Hudas, e traidor, a palabrá un señal ku nan; el a bisa nan: ‘Esun ku mi kumindá ku un sunchi, t'e, koh'é prezu.’

⁴⁹ Asina antó Hudas a bai derechitu serka Hesus. El a kumind'É ku un sunchi i a bis'É: ‘Maestro, mi ta kumindá Bo!’

⁵⁰ Hesus a kontest'é: ‘Mi amigu, hasi e kos ku bo a bin hasi!’ E ora ei nan a kohe Hesus tene i arest'É.

⁵¹ Un di esnan ku tabata huntu ku Hesus, a saka su sabla, kap un orea di e kriá di gransaserdote kita afó.

⁵² E ora ei Hesus a bisa: ‘Hinka bo sabla bèk na su lugá; ken ku usa sabla pa bringa, lo muri di sabla.

⁵³ Bo no sa ku Mi por pidi mi Tata yuda Mi i ku E por manda mas ku diesdos ehérsito grandi di angel pa yuda Mi?

⁵⁴ Ma e ora ei, ta kon Skritura ku ta bisa ku e kosnan akí mester pasa, por keda kumplí?’

⁵⁵ Na e momento ei Hesus a tuma palabra i bisa e multitut: ‘Ta un bandidu Mi ta antó, ku boso mester bini ku sabla i chikoti pa kohe Mi prezu? Dia aden dia afó Mi tabata sinta den tèmpel ta duna instrukshon i boso no a kohe Mi prezu.

⁵⁶ Ma tur e kosnan akí a sosodé pa Skritura di e profetanan keda kumplí.’ E ora ei tur e disipelnan a bandoná Hesus i a hui bai.

Hesus dilanti di Konseho Supremo

⁵⁷ Esnan ku a kohe Hesus prezu a hib'É kas di gransaserdote Kaifas, kaminda e ansianonan i e dòktornan di lei a reuní.

⁵⁸ Pedro a sigui Hesus na un distansia grandi te den patio di e kas di gransaserdote. Ei el kai sinta huntu ku e kriánan pa e mira kon kos lo kaba.

⁵⁹ E saserdotenan importante i henter Konseho Supremo tabata buska testimonio falsu kontra Hesus pa nan por a mat'É,

⁶⁰ ma nan no por a haña nada, ounke hopi hende a presentá pa duna testimonio falsu. Finalmente dos hende a bini aserka

⁶¹ bin bisa: ‘Nos a tend'é bisa: “Mi por destruí e tèmpel di Dios i Mi ta lant'é atrobe den tres dia.” ’

⁶² Gransaserdote a lanta para puntra Hesus: ‘Bo no tin nada di bisa? Ta ki e kosnan akí ku nan ta akusá bo di dje?’

⁶³ Hesus a keda ketu. Gransaserdote a bis'É: ‘Den nòmber di Dios bibu, mi ta pone bo bou di huramentu: Bisa nos: ta abo ta Mesias, e Yu di Dios?’

⁶⁴ Hesus a kontest'é: ‘Manera bo di! For di awe, boso lo mira e Yu di hende sintá na man drechi di Dios Poderoso i biniendo riba e nubianan na shelu.’

⁶⁵ Di konsternashon gransaserdote a sker su paña kibra i grita: ‘El a blasfemá Dios, ki testigu mas nos mester? Awor boso mes a tend'é blasfemá Dios.

⁶⁶ Ki boso ta pensa di e asuntu akí?’ Nan a kontestá: ‘E meresé kastigu di morto.’

⁶⁷ Nan a skupi Hesus den su kara, dal E moketa, batiÉ

⁶⁸ i bis'É: ‘Profetisá pa nos, Mesias. Ta ken a dal bo?’

Pedro ta nenga ku e konosé Hesus

⁶⁹ Pedro tabata abou den patio ainda, ora un kriá a aserk'é i bis'é: ‘Bo tambe tabata huntu ku e Hesus di Galilea ei!’

⁷⁰ Ma Pedro a nenga dilanti tur hende i bisa: ‘Mi no sa ta kiko bo ta papia.’

⁷¹ Pedro a bai na porta di entrada i un otro kriá ku a mir'é, a bisa e hendenan pará eibanda tambe: ‘E hòmber akí tabata huntu ku Hesus di Nazarèt!’

⁷² Pedro a bolbe nenga, e bia akí bou di huramentu: ‘Mi no konosé e hòmber ei!’

⁷³ Poko despues e hendenan pará ei banda tambe a aserk'é i a bis'é: ‘Enberdat, abo tambe ta un di nan; bo papiá ta reda bo!’

⁷⁴ Ma Pedro a kuminsá deklará bou di huramentu: ‘Maldishon di Dios kai riba mi, si mi ta gaña. Ami no konos'é e hòmber ei mes!’ Nèt na e momento ei, un gai a kanta.

⁷⁵ E ora ei Pedro a bin kòrda loke Hesus a bis'é: ‘Promé ku gai kanta, ya lo bo a nenga Mi tres be.’ El a bai pafó i a yora amargamente.