Mateo 20 - Papiamentu Bible 2013

Parábola di e trahadónan den hòfi di wendrùif

¹ Hesus a sigui bisa: ‘Reino di shelu ta manera e kaso di un doño di kas, ku a sali mainta trempan bai buska hende pa traha den su hòfi di wendrùif.

² El a kumbiní ku e trahadónan pa paga nan un moneda di plata pa dia i a manda nan bai traha den su hòfi.

³ Band'i nueb'or di mainta, El a bolbe sali i a mira algun hòmber pará pòrnada na plasa.

⁴ El a bisa nan: “Boso tambe bai traha den mi hòfi; lo mi paga boso un suèldu hustu.”

⁵ E hòmbernan a bai. Diesdos or i tres or e doño a hasi meskos.

⁶ Band'i sink'or el a bolbe sali i a haña mas hende pará pòrnada. El a puntra nan: “Pakiko boso ta para pòrnada aki henter dia?”

⁷ Nan a kontest'é: “Niun hende no a buska nos pa traha pa nan.” E ora ei el a bisa nan: “Boso tambe bai traha den mi hòfi.”

⁸ Ora nochi a sera, e doño a yama su vitó i a bis'é: “Yama e trahadónan i paga nan, kuminsá ku esnan ku a bini delaster i terminá ku esnan ku a bini promé.”

⁹ Ora esnan ku a kuminsá traha sink'or a yega, nan a haña un moneda di plata komo pago.

¹⁰ Awor, ora esnan ku a kuminsá traha promé a bini pa haña nan pago, nan a kere ku nan lo a haña mas tantu sèn. Ma nan tambe a haña un moneda di plata.

¹¹ Nan a tuma e sèn i a kuminsá murmurá kontra e doño.”

¹² Nan tabata bisa: “E hendenan ku a bini delaster a traha un ora so! Anto nos, ku a hul nos kurpa henter dia den solo kayente, bo ta duna mesun pago ku nan?”

¹³ E doño a kontestá un di nan: “Ma amigu, mi no ta trata bo inhustu. No ta pa un moneda di plata nos a kumbiní?

¹⁴ Kohe bo sèn antó i bai kas. Mi ke duna esun ku a bini delaster mes tantu ku bo.

¹⁵ Akaso mi no tin derechi di hasi loke mi ta haña ta bon, ku mi mes plaka? Yalurs bo ta pasobra mi ta hasi bon?” ’

¹⁶ Hesus a konkluí: ‘Esnan ku ta delaster lo ta promé i esnan ku ta promé lo ta delaster.’

Hesus ta konta di su morto i resurekshon pa di tres be

¹⁷ Ora Hesus tabata na kaminda pa Herusalèm, El a hala su diesdos disipelnan un banda i bisa nan:

¹⁸ ‘Tende, nos ta subi bai Herusalèm kaminda Yu di hende lo keda entregá den man di e saserdotenan importante i di e dòktornan di lei. Nan lo konden'É na morto i entreg'É den man di pagano

¹⁹ ku lo hasi bofon di djE, sut'É ku karbachi i krusifik'É, ma riba e di tres dia lo E lanta for di morto.’

Mama di Hakobo i Huan ta hasi un petishon

²⁰ Mama di Hakobo i Huan, yunan di Zebedeo, a aserká Hesus huntu ku su yunan, el a hinka rudia su dilanti i a pidiÉ un fabor.

²¹ Hesus a bis'é: ‘Kiko bo ke?’ E ora ei, e mama a bis'É: ‘Duna òrdu pa e dos yu hòmbernan di mi akí sinta huntu ku bo den bo reino: un na bo man drechi, e otro na bo man robes.’

²² Hesus a bisa nan: ‘Boso no sa loke boso ta pidi! Boso por bebe e kopa di sufrimentu ku Ami ta bai bebe?’ ‘Sí, nos por,’ nan a kontest'É.

²³ Hesus a sigui bisa: ‘Boso lo bebe for di mi kopa. Ma ken ta sinta na mi man drechi òf na mi man robes, no ta algu ku Ami ta disidí; mi Tata a prepará e lugá ei pa esnan ku El a destiná pa sinta ei.’

²⁴ Ora ku e dies otro disipelnan a tende loke a pasa, nan a bira di malu riba e dos rumannan.

²⁵ Hesus a yama nan tur serka djE i bisa nan: ‘Boso sa ku gobernantenan ta dominá e hendenan di nan nashon i ku lidernan ta hunga bas riba nan.

²⁶ Esei no mester tuma lugá serka boso. Al kontrario, esun ku ke ta grandi meimei di boso mester sirbi e otronan.

²⁷ Es ku ke ta number ún mester ta boso katibu.

²⁸ Meskos ku Yu di hende no a bini pa hende sirbiÉ ma pa E sirbi nan i pa E entregá su bida pa liberashon di hopi hende.’

Sanashon di dos siegu

²⁹ Ora Hesus ku su disipelnan tabata sali for di Yériko, un multitut grandi tabata siguiÉ.

³⁰ Dos hòmber siegu ku tabata sintá kant'i kaminda, a tende ku ta Hesus tabata kana pasa. Nan a grita: ‘Señor, Yu di David, tene mizerikòrdia ku nos!’

³¹ E hendenan a rous nan manda nan keda ketu, ma nan a grita mas duru ainda: ‘Señor, Yu di David, tene mizerikòrdia ku nos’

³² Hesus a keda para i yama nan. El a puntra nan: ‘Kiko boso ke pa Mi hasi pa boso?’

³³ Nan a kontestá: ‘Señor, duna nos nos bista bèk.’

³⁴ Hesus a haña duele di nan i a mishi ku nan wowo. Mesora nan por a mira atrobe i nan a sigui tras di Hesus.