Mateo 16 - Papiamentu Bible 2013

Fariseonan ta pidi Hesus señal milagroso

¹ Sierto fariseo i saduseo a aserká Hesus pa purba lag'É kai den trampa i p'esei nan a pidiÉ un señal pa mustra nan ku Dios tabata kunÉ.

² Hesus a kontestá nan: ‘Atardi boso ta bisa: “Ta bai tin bon wer, pasobra shelu ta kòrá!”

³ Anto mainta trempan boso ta bisa: “Ta bai tin mal tempu, pasobra shelu ta kòrá i skur.” Boso por wak shelu i bisa ki sorto di wer ta na kaminda, ma e señalnan ku ta tuma lugá den e tempu akí boso no por interpretá.

⁴ Un generashon malbado i perverso ta pidi señal, ma nan lo no haña ningun señal ku no ta e señal di Yonas.’ El a kita bai, laga nan.

Zürdeg di e fariseonan i zürdeg di Heródes

⁵ Ora nan a bai na otro banda di lago, e disipelnan a lubidá di bini ku pan.

⁶ Hesus a bisa nan: ‘Paga tinu! Libra boso di zürdeg di e fariseo i saduseonan.’

⁷ Nan tabata papia ku otro tokante e situashon i bisa: ‘E ta bisa asina, pasobra nos no a bini ku pan.’

⁸ Hesus ku a ripará esei a bisa nan: ‘Pakiko boso ta diskutí si boso tin pan òf no? Te ainda boso no ta komprondé?

⁹ Boso no ta kòrda dia Mi a kibra e sinku pannan pa e sinku mil hendenan ta kuantu makutu boso a yena ku e pidanan ku a sobra?

¹⁰ I ora Mi a kibra e shete pannan pa parti pa e kuater mil hendenan, kuantu makutu grandi boso a yena?

¹¹ Ta kon por ta antó ku boso no ta komprondé ku no ta tokante pan Mi tabata papia ku boso? Ma tene kuidou ku zürdeg di e fariseo i saduseonan.’

¹² E ora ei nan a bin komprondé ku no ta ku zürdeg den pan El a bisa nan tene kuidou, sino ku siñansa di e fariseo i saduseonan.

Pedro ta deklará ku Hesus ta Mesias

¹³ Ora Hesus a yega region di Sesarea Filipi, El a puntra su disipelnan: ‘Ken e hendenan ta bisa e Yu di hende ta?’

¹⁴ Nan a kontestá: ‘Tin ta bisa ku Bo ta Huan Boutista, otro ta bisa Bo ta Elías i tin algun otro ta pensa ku Bo ta Yeremías òf un di e profetanan.’

¹⁵ E ora ei Hesus a puntra nan: ‘Anto boso mes, ken boso mes ta bisa Mi ta?’

¹⁶ Simon Pedro a kontestá: ‘Bo ta Mesias, e Yu di Dios Bibu!’

¹⁷ Hesus a bis'é: ‘Felis bo ta, Simon, yu di Huan, pasobra no ta hende a revelá bo esaki, ma mi Tata ku ta den shelu.

¹⁸ I Mi ta bisa bo: abo ta Pedro, esta baranka, i riba e baranka akí lo Mi traha mi iglesia; forsa di morto lo no triunfá riba dje.

¹⁹ Lo Mi duna bo e yabinan di reino di shelu, i loke bo prohibí na tera, lo ta prohibí den shelu tambe. Loke bo pèrmití na tera, lo ta pèrmití den shelu tambe.’

²⁰ Na e okashon ei, Hesus a prohibí nan di bisa kualke hende ku t'É ta Mesias.

Hesus ta konta di su morto i su resurekshon

²¹ For di e momento ei, Hesus a kuminsá mustra su disipelnan klaramente ku E mester bai Herusalèm i mester sufri hopi kos na man di e ansiano, saserdote importante i dòktornan di lei i ku hende lo mat'É. Ma riba e di tres dia lo E lanta for di morto.

²² Pedro a hal'É un banda, kuminsá skual E i bis'É: ‘Dios mester libra, Señor! Hamas e kosnan ei lo no pasa ku Bo!’

²³ Hesus a bira bisa Pedro: ‘Bai for di Mi, satanas! Bo ta un estorbo pa Mi; bo no ta pensa manera Dios, ma manera hende!’

²⁴ Despues El a bisa su disipelnan: ‘Si un hende ke sigui Mi, e mester lubidá su mes, hisa su krus i sigui Mi.

²⁵ Pasobra esun ku ke salba su bida, lo pèrd'é, ma esun ku entregá su bida pa Mi, lo hañ'é bèk.

²⁶ Ki benefisio un hende tin si e gana henter mundu a kosto di su bida? Pasobra kiko un hende lo por duna komo pago pa su bida?

²⁷ Yu di hende lo bini den gloria di su Tata huntu ku su angelnan i e ora ei lo E rekompensá tur hende di akuerdo ku nan aktonan.

²⁸ Mi ta sigurá boso: tin di boso aki ku lo no muri promé nan mira e Yu di hende bini komo rei.’