Mateo 14 - Papiamentu Bible 2013

Morto di Huan Boutista

¹ Den e tempu ei gobernador Heródes di Galilea a bin tende tokante Hesus.

² El a bisa su kriánan: ‘Ta Huan Boutista! El a lanta for di morto; p'esei e tin poder pa hasi milager!’

³ A sosodé ku Heródes a manda kohe Huan, bui e i ser'é den prizòn pa motibu di Heródias, señora di su ruman hòmber Filipo.

⁴ Pasobra Huan tabata bisa Heródes: ‘No ta pèrmití pa bo biba ku Heródias.’

⁵ Ounke Heródes ker a laga mat'é, e no a hasié pasobra e tabatin miedu di e pueblo. Ta asina ku nan tabata konsiderá Huan un profeta.

⁶ Dia a selebrá Heródes su aña, e yu muhé di Heródias a presentá un baile dilanti di e invitadonan i e baile a deleitá Heródes.

⁷ P'esei Heródes a primintí bou di huramentu di dun'é kiko ku e pidié.

⁸ Riba instigashon di su mama e hobensita a bisa: ‘Mi ke pa bo duna mi kabes di Huan Boutista riba un skalchi.’

⁹ Heródes a bira tristu, ma el a duna òrdu pa hasi loke e hobensita a pidié, pasobra el a hura dilanti di su invitadonan.

¹⁰ El a manda un hende prizòn bai kap Huan su kabes kita afó.

¹¹ Nan a trese e kabes riba un skalchi i pas'é pa e hobensita ku na su turno a hib'é pa su mama.

¹² E disipelnan di Huan a bin kohe e kadaver i der'é. Despues nan a bai konta Hesus kiko a pasa.

Hesus ta duna sinku mil hende di kome

¹³ Ora Hesus a tende tur e kosnan akí, El a kita bai for di e lugá ei. Ku boto El a bai un lugá solitario. Ora e hendenan a tende, nan a sali for di e siudatnan i siguiÉ na pia.

¹⁴ Ora Hesus a sali for di e boto i mira e multitut grandi, El a haña duele di nan i a kura nan enfermonan.

¹⁵ Komo ya a bira hopi lat, e disipelnan a bin bisa Hesus: ‘E lugá akí ta solitario i ta lat kaba. Manda e hendenan akí bai ya nan por kumpra kuminda pa nan mes.’

¹⁶ Hesus a bisa nan: ‘Nan no tin nodi di bai. Boso mes duna nan di kome.’

¹⁷ Nan a kontestá: ‘Ma ta sinku pan i dos piská so nos tin aki.’

¹⁸ Anto Hesus a bisa: ‘Trese nan pa Mi.’

¹⁹ El a manda e hendenan kai sinta riba yerba. E ora ei Hesus a kohe e sinku pan- i e dos piskánan; El a hisa su kara na shelu i gradisí Dios. Despues El a kibra e pannan i duna su disipelnan, ku a parti pa e hendenan.

²⁰ Tur hende a kome barika yen. E disipelnan a yena diesdos makutu yen yen ku loke a sobrá dje pannan.

²¹ Un kantidat di sinku mil hòmber a kome di e pan, sin konta e muhé i e muchanan ku tabat'ei.

Hesus ta kana riba awa

²² Djis despues Hesus a manda su disipelnan drenta boto, krusa lago promé kunÉ. E mes a keda pa E manda e multitut bai kas.

²³ Despues ku El a manda e hendenan bai, El a bai resa E so den seru. Ora anochi a sera, El a keda E so kantu di laman.

²⁴ E boto a yega na un bon distansia for di tera kaba i tabata pasa trabou pa bai dilanti, pasobra bientu tabata kontrali.

²⁵ Durante e di kuater warda, Hesus a kana riba awa bai serka e disipelnan.

²⁶ Ora nan a mira Hesus ta kana riba awa, nan a drenta pániko i bisa: ‘Ta spiritu!’ i nan a grita di miedu.

²⁷ Mesora Hesus a kuminsá papia ku nan i bisa: ‘Keda trankil, t'Ami, no tene miedu!’

²⁸ Awor Pedro a rospondé: ‘Señor, si ta Abo, laga mi kana riba awa bini serka Bo!’

²⁹ Hesus a bis'é: ‘Bini numa.’ Pedro a sali for di e boto i a kana riba awa bai serka Hesus.

³⁰ Ma ora el a sinti e bientu fuerte, el a haña miedu i a kuminsá senk. El a grita: ‘Señor, salba mi!’

³¹ Mesora Hesus a rèk man, koh'é tene i bis'é: ‘Hende di poko fe, pakiko bo a kuminsá duda?’

³² Ora nan a drenta den e boto, bientu a kalma.

³³ E disipelnan den e boto a hinka rudia p'E i bisa: ‘Enberdat, Abo ta Yu di Dios.’

Hesus ta kura e hende malunan na Genesarèt

³⁴ Hesus i su disipelnan a krusa e lago i a yega region di Genesarèt.

³⁵ E hendenan di e region ei a rekonosé Hesus i a plama e notisia den henter bisindario. P'esei e hendenan a trese tur esnan ku tabata malu serka djE i

³⁶ nan tabata rog'É pa e enfermonan por a djis mishi ku un punta di su paña. Tur esnan ku a mishi kunÉ a kura.