Mateo 1 - Papiamentu Bible 2013

Antepasadonan di Hesus

¹ Ata lista di e antepasadonan di Hesu-Kristu, desendiente di David i via David desendiente di Abraham.

² Abraham tabata tata di Isak; Isak di Yakob; Yakob di Huda i di e rumannan di Huda;

³ Huda di Pèrès i Zèrag (nan mama tabata Tamar); Pèrès di Hèsron; Hèsron di Ram;

⁴ Ram di Aminadab; Aminadab di Nagshon; Nagshon di Salmon;

⁵ Salmon di Boaz (su mama tabata Rahab); Boaz di Obed (su mama tabata Ruth); Obed di Ishai;

⁶ Ishai di rei David. David tabata tata di Salomon (su mama tabata kasá di Urías);

⁷ Salomon di Rehabeam; Rehabeam di Abías; Abías di Asa;

⁸ Asa di Yoshafat; Yoshafat di Yoram; Yoram di Uzías;

⁹ Uzías di Yotam; Yotam di Ahas; Ahas di Ezekías;

¹⁰ Ezekías di Manase; Manase di Amon; Amon di Yosías;

¹¹ Yosías di Yekonías i su rumannan den tempu ku a deportá e israelitanan pa Babilonia.

¹² Despues di e deportashon pa Babilonia, Yekonías a bira tata di Shealtiel; Shealtiel di Zerubabel;

¹³ Zerubabel di Abihud; Abihud di Elyakim; Elyakim di Azor;

¹⁴ Azor di Sadok; Sadok di Akim; Akim di Eliud;

¹⁵ Eliud di Eleazar; Eleazar di Matan; Matan di Yakob.

¹⁶ Yakob tabata tata di Hosé, kasá di Maria; Maria tabata mama di Hesus, ku nan a yama Mesias.

¹⁷ Ke men ku tabatin dieskuater generashon for di Abraham te na David, dieskuater generashon for di David te na tempu ku nan a deportá e israelitanan pa Babilonia i dieskuater generashon for di e deportashon akí te na nasementu di Mesias.

Nasementu di Hesus

¹⁸ Nasementu di Hesu-Kristu a bai di e siguiente manera. Maria, mama di Hesus, tabata komprometé ku Hosé, ma a resultá ku el a sali na estado promé ku nan a kasa. Esei a sosodé via di Spiritu Santu.

¹⁹ Komo Hosé tabata un hòmber hustu i e no ker a pone Maria su kara na bèrgwensa, el a plania pa divorsiá di dje ketu ketu.

²⁰ Miéntras e tabata pensa riba e asuntu akí, un angel di Señor a aparesé n'e den soño i bis'é: ‘Hosé, desendiente di David, no tene miedu pa tuma Maria komo bo kasá, pasobra e yu ku e ta spera ta di Spiritu Santu.

²¹ Lo e duna lus na un yu hòmber i lo bo yama e yu “Hesus”, pasobra lo E salba su pueblo for di piká.’

²² Tur esaki a sosodé pa e palabranan ku Señor a bisa via di e profeta, keda kumplí:

²³ ‘Mira, un bírgen lo sali na estado i duna lus na un yu hòmber. Lo yam'É “Emanuel”, loke ta nifiká “Dios ku nos”.’

²⁴ Ora Hosé a lanta for di soño, el a kasa ku Maria manera e angel di Señor a enkarg'é.

²⁵ E no a tene relashon ku Maria promé ku Maria a duna lus na un yu hòmber i el yama e yu ‘Hesus’.