Marko 14 - Papiamentu Bible 2013

E kòmplòt pa mata Hesus

¹ Tabata falta dos dia pa fiesta di Pésag, e fiesta di pan sin zürdeg. E saserdotenan importante i e dòktornan di lei tabata buska un manera astuto pa kohe Hesus prezu i mat'É.

² Nan a bisa otro pa no hasi esaki durante e dianan di fiesta pa e pueblo no rebeldiá.

Un muhé ta basha perfume riba Hesus

³ Hesus tabata na Betania na kas di Simon, e leproso. Miéntras E tabata sinta kome, un muhé a drenta ku un butishi yená ku zeta perfumá karu, trahá di nardo puru; el a kibra garganta di e butishi basha e perfume riba Hesus su kabes.

⁴ Rabiá algun hende a puntra otro: ‘Ta ki nodi tin di dispidí e perfume?

⁵ Por a bend'é pa mas ku 300 moneda di plata i duna hende pober e sèn.’ Nan a keda kritiká e muhé fuertemente.

⁶ Hesus a bisa nan: ‘Lag'é na pas. Pakiko boso ta molesti'é? El a hasi un bon kos pa Mi.

⁷ Hende pober boso lo tin semper serka boso i boso por yuda nan ora boso ke, ma Ami sí boso lo no tin semper serka boso.

⁸ E muhé akí a hasi loke tabata na su alkanse; el a hunta mi kurpa ku zeta, promé ku e tempu a yega, komo preparashon pa mi entiero.

⁹ Mi ta sigurá boso: na tur lugá na mundu kaminda prediká e bon notisia, lo menshoná loke e muhé akí a hasi i lo sigui rekord'é.’

Hudas ta disidí di traishoná Hesus

¹⁰ E ora ei Hudas Iskariot, un di e diesdos disipelnan, a bai serka e saserdotenan importante pa traishoná Hesus.

¹¹ Ora nan a tende loke e ker a hasi, nan a bira kontentu i primintié di dun'é plaka. Asina Hudas a kuminsá buska un momento oportuno pa entregá Hesus.

Hesus ta kompartí sena di Pésag ku su disipelnan

¹² Riba promé dia di fiesta di pan sin zürdeg, ora ta mata e lamchi pa sena di Pésag, Hesus su disipelnan a puntr'É: ‘Unda Bo ke pa nos bai prepará sena di Pésag pa Bo kome?’

¹³ Hesus a manda dos disipel bai i ordená nan: ‘Drenta siudat. Aya boso lo topa un hòmber ku ta karga un tinashi di awa; siguié.

¹⁴ Bisa doño di e kas kaminda e drenta: “Maestro ta puntra: unda e kamber kaminda Mi por tene sena di Pésag ku mi disipelnan ta?”

¹⁵ E doño di kas lo mustra boso un kamber grandi ariba, mueblá i kla prepará kaba; ei boso mester prepará tur kos pa nos.’

¹⁶ E disipelnan a sali bai drenta e siudat, kaminda nan a haña tur kos manera Hesus a konta nan; nan a prepará sena di Pésag.

¹⁷ Ora a bira nochi, Hesus i su diesdos disipelnan a bini.

¹⁸ Miéntras nan tabata na mesa ta kome, Hesus a bisa su disipelnan: ‘Mi ta sigurá boso: ún di boso ku ta kome huntu ku Mi, lo traishoná Mi.’

¹⁹ E disipelnan a bira fèrdrit i un tras di otro tabata bis'É: ‘N' t'ami sí, no!’

²⁰ Ma Hesus a kontestá nan: ‘Ún di boso ta traishoná Mi; ún ku ta dòp su pan den skalchi huntu ku Mi.

²¹ Sí, manera ta skibí den Skritura, Yu di hende mester bai, ma ai di e hende ku traishon'É! Ta mihó pa e hende ei ku nunka e no a nase mes!’

Sena di Señor

²² Miéntras nan tabata kome, Hesus a kohe pan; El a gradisí Dios, kibra e pan i duna su disipelnan. ‘Tuma, esaki ta mi kurpa,’ El a bisa.

²³ Despues El a kohe un kopa di biña, yama Dios danki i pasa e kopa pa nan i tur a bebe for di dje.

²⁴ El a bisa: ‘Esaki ta mi sanger, ku ta konfirmá e aliansa; e sanger ku lo ta dramá pa hopi hende.

²⁵ Mi ta sigurá boso ku lo Mi no bebe biña mas te dia Mi bebe biña nobo den reino di Dios.’

²⁶ Despues di a kanta himno, nan a sali pa Seru di Oleifi.

Hesus ta bisa delantá ku Pedro lo neng'É

²⁷ Hesus a bisa su disipelnan: ‘Boso lo pèrdè fe den Mi i bandoná Mi! Lo sosodé manera Dios ta bisa den Skritura: Lo Mi mata e wardadó; i e karnénan lo plama for di otro.

²⁸ Ma despues ku Mi lanta for di morto, lo Mi bai Galilea boso dilanti.’

²⁹ Pedro a kontestá: ‘Maske tur sobrá pèrdè fe den Bo i bandoná Bo, ami sí lo no hasié.’

³⁰ Hesus a kontest'é: ‘Marka mi palabra! Promé ku gai kanta pa di dos be awe nochi, ya lo bo a nenga tres be ku bo konosé Mi.’

³¹ Ma Pedro a sigui insistí ku mas forsa ainda: ‘Maske mi mester muri huntu ku Bo, nenga sí lo mi no nenga bo!’ Tur e otro disipelnan tambe tabata bisa tipo di kosnan asina.

Hesus ta resa den hòfi di Getsémani

³² Ora nan a yega un lugá ku yama Getsémani, Hesus a bisa su disipelnan: ‘Keda sinta aki, turesten Mi ta bai resa.’

³³ El a bai ku Pedro, Hakobo i Huan; El a kuminsá sinti miedu i a bira intrankil.

³⁴ El a bisa nan: ‘Mi ta sinti un tristesa asina grandi den mi kurason ku Mi por muri; keda aki, ma keda alerta.’

³⁵ Hesus a bai un tiki mas leu i a tira su kurpa abou na suela. E tabata resa pa, si ta posibel, e ora di sufrimentu pasa bai lag'É.

³⁶ El a bisa: ‘Abba, o mi Tata! Pa Bo tur kos ta posibel; tuma e kopa di sufrimentu akí for di Mi. Pero no loke Ami ke, ma loke Abo ke.’

³⁷ El a bai bèk i haña e tres disipelnan drumí na soño. El a bisa Pedro: ‘Simon, bo ta drumí no? Bo no por a keda ni sikiera un ora lantá?

³⁸ Boso mester keda lantá i resa pa boso no kai den tentashon. Spiritu di hende tin boluntat sí, ma ta hende mes ta débil.’

³⁹ Hesus a bolbe bai hasi e mesun orashon.

⁴⁰ Ora El a bini bèk, El a bolbe haña nan na soño, pasobra nan wowo a bira pisá. Nan no tabata sa kiko bis'É.

⁴¹ El a bini bèk pa di tres be i bisa nan: ‘Sigui drumi i sosegá numa. Ya tur kos a pasa. Awor e ora a yega! Nan ta entregá Yu di hende den man di pekadó.

⁴² Lant'ariba, laga nos ban; esun ku a traishoná Mi, ta serka di yega.’

Nan ta kohe Hesus prezu

⁴³ Hesus no a kaba di papia ainda, ku ata Hudas, un di e diesdos disipelnan, a yega. E tabata den kompania di un grupo di hende ku e saserdotenan importante, e dòktornan di lei i e ansianonan a manda. E hendenan tabata armá ku sabla i palu.

⁴⁴ Hudas, e traidor, a palabrá un señal ku nan; el a bisa nan: ‘Esun ku mi kumindá ku un sunchi, t'e, koh'é prezu i bai kuné bon tené pa e no hui.’

⁴⁵ Asina anto Hudas a bai derechitu serka Hesus. El a kumind'É ku un sunchi i a bis'É: ‘Maestro!’

⁴⁶ Nan a kohe Hesus tene i arest'É.

⁴⁷ Un di esnan ku tabata pará einan, a saka su sabla, kap orea di e kriá di gransaserdote kita afó.

⁴⁸ Hesus a tuma palabra i bisa nan: ‘Ta un bandidu Mi ta antó, ku boso mester bini ku sabla i chikoti pa kohe Mi prezu?

⁴⁹ Dia aden dia afó Mi tabata den tèmpel serka boso ta duna instrukshon i boso no a kohe Mi prezu. Ma Skritura mester keda kumplí.’

⁵⁰ Tur e disipelnan a bandoná Hesus i a hui bai.

⁵¹ Tabatin awor un hóben einan ku un paña di lenen so lorá na su kurpa, ku tabata sigui Hesus. Nan a purba koh'é prezu,

⁵² ma el a laga su paña atras, saka un kareda kore bai blo sunú.

Hesus dilanti di Konseho Supremo

⁵³ Nan a hiba Hesus na kas di gransaserdote; ei tur e saserdotenan importante, e ansianonan i e dòktornan di lei a reuní.

⁵⁴ Pedro a sigui Hesus na un distansia grandi te den patio di e kas di gransaserdote. Ei e tabata sintá huntu ku e kriánan ta keinta kurpa na e kandela.

⁵⁵ E saserdotenan importante i henter Konseho Supremo, tabata buska un testimonio kontra Hesus pa por a mat'É, ma nan no por a haña nada.

⁵⁶ Echo ta ku hopi hende a duna testimonio falsu kontra Hesus, ma nan testimonio no tabata kuadra ku otro.

⁵⁷ Algun di e hendenan ku tabata pará einan, tambe a gaña riba djE; nan a bisa:

⁵⁸ ‘Nos a tend'É bisa: “Mi ta destruí e tèmpel akí ku hende a traha i den tres dia Mi ta lanta un otro, ku no ta man di hende a traha.” ’

⁵⁹ Ma asta nan testimonio tampoko no tabata kuadra ku otro!

⁶⁰ Gransaserdote a lanta bai para meimei di e kren i interogá Hesus; el a puntr'É: ‘Bo no tin nada di bisa? Ta kiko e kosnan akí ku nan ta akusá Bo di dje?’

⁶¹ Hesus a keda ketu; E no a rospondé niun pia di palabra. Gransaserdote a bolbe papia kunÉ, el a puntr'É: ‘Ta abo ta Mesias, Yu di Esun Bendishoná?’

⁶² Hesus a kontest'é: ‘Sí, t'Ami t'E! Boso lo mira Yu di hende sintá na man drechi di Dios Poderoso i biniendo riba e nubianan na shelu.’

⁶³ Di konsternashon gransaserdote a sker su paña kibra i grita: ‘Ki testigu mas nos mester?

⁶⁴ Boso mes a tend'É blasfemá Dios. Kiko boso ta pensa di e asuntu akí?’ Tur a kondená Hesus i bisa pa mat'É.

⁶⁵ Algun hende a kuminsá skupi Hesus, tapa su wowo, dal E ku moketa, i bis'É: ‘Profetisá ta ken a dal bo!’ E kriánan tambe a dal E wanta.

Pedro ta nenga ku e konosé Hesus

⁶⁶ Pedro tabata abou den patio ainda, ora un kriá di gransaserdote a pasa eibanda.

⁶⁷ Ora e kriá a mir'é ta keinta kurpa, el a wak e duru den su kara i bis'é: ‘Bo tambe tabata huntu ku e Hesus di Nazarèt ei!’

⁶⁸ Ma Pedro a nenga i bisa: ‘Mi no sa ta kiko bo ta papia; mi no ta komprondé kiko bo ke men.’ El a sali bai na entrada. Un gai a kanta.

⁶⁹ Ora e mucha muhé a wak e einan, el a bisa e hendenan pará eibanda tambe: ‘E hòmber akí ta un di nan!’

⁷⁰ Pedro a bolbe nenga, ma poko despues e hendenan pará eibanda tambe a kuminsá bis'é: ‘Enberdat, bo ta un di nan, pasobra bo tambe ta galileo!’

⁷¹ Ma Pedro a kuminsá deklará bou di huramentu: ‘Maldishon di Dios kai riba mi, si mi ta gaña. Ami no konosé e hòmber ku boso ta papia di djE ei mes!’

⁷² Nèt na e momento ei gai a kanta pa di dos be. E ora ei Pedro a bin kòrda loke Hesus a bis'é: ‘Promé ku gai kanta pa di dos be, ya lo bo a nenga Mi tres be.’ I el a grita yora.