Marko 12 - Papiamentu Bible 2013

Parábola di e hürdónan mal hende

¹ Hesus a kuminsá papia ku nan pa medio di parábola i a konta nan: ‘Un dia tabatin un hòmber ku a planta un hòfi di wendrùif. El a ser'é ku un tranké, traha un baki pa fangu djus di e wendrùif ku machiká. Tambe el a traha un toren di vigilansia. Despues el a hür e hòfi ku algun kunukero i sali di biahe.

² Den tempu di kosecha, el a manda un kriá bai tuma su parti serka e kunukeronan.

³ Sinembargo e kunukeronan a kohe e kriá dun'é un halá di sota mand'é bai man bashí.

⁴ E doño a bolbe manda un kriá serka nan; nan a dal e kriá akí na su kabes i maltrat'é.

⁵ E doño a manda un otro kriá; esun akí nan a mata. Asina nan a sigui hasi ku tur otro kriá ku tabata bini; nan tabata bati algun i otro nan tabata mata.

⁶ A sobra e doño su yu stimá so pa manda i por último e doño a mand'é serka nan. El a pensa: “Mi yu sí nan lo respetá!”

⁷ Ma e kunukeronan a bisa otro: “Esun akí ta e heredero! Ban, laga nos kaba kuné, ya nos ta haña su herensia!”

⁸ Nan a koh'é tene, mat'é i tir'é despues pafó di e hòfi.

⁹ Kiko doño di e hòfi lo hasi awor? E mes lo bin kaba ku e kunukeronan i pasa su hòfi pa otro hürdó.

¹⁰ Nunka boso no a mira den Skritura ku tin skibí: E piedra ku e trahadónan a rechasá, a bira piedra prinsipal;

¹¹ ta trabou di Señor esei, algu milagroso pa mira!’

¹² E saserdotenan importante, e dòktornan di lei i e ansianonan tabata sa ku ta di nan e komparashon tabata trata. P'esei nan ker a kohe Hesus prezu, ma nan tabatin miedu di e multitut; nan a bai lag'É.

Dios òf emperador?

¹³ Nan a manda algun fariseo i algun hende di Heródes pa kohe Hesus den trampa ku su mes palabranan.

¹⁴ Nan a aserk'É i bis'É: ‘Maestro, nos sa ku bo ta un hende honesto; bo no ta wòri bo kabes ku loke hende ta pensa, pasobra bo no ta husga segun aparensia. Ma segun bèrdat bo ta siña hende kon Dios ke pa nan biba. Bisa nos: Ta korekto pa paga belasting na emperador di Roma; sí òf nò?’

¹⁵ Hesus a mira ku nan tabata hunga ròl; p'esei El a kontestá: ‘Pakiko boso ta buska moda di laga Mi kai den trampa? Trese un moneda pa Mi mira.’

¹⁶ Nan a hiba un p'E i Hesus a sigui bisa: ‘Ken su nòmber i su imágen tin aki riba?’ Nan a kontestá: ‘Di emperador.’

¹⁷ E ora ei Hesus a bisa nan: ‘Wèl, duna emperador loke ta di emperador i Dios loke ta di Dios.’ Nan a keda mashá asombrá.

Un pregunta tokante resurekshon

¹⁸ Algun saduseo, esta e hendenan ku tabata bisa ku hende lo no lanta for di morto, a bini serka Hesus i bis'É:

¹⁹ ‘Maestro, Moises a skibi e lei akí pa nos: “Si un hòmber muri bai laga su kasá sin yu, ruman hòmber di e defuntu mester tuma e biuda pa kasá pa asina duna su ruman ku a muri, yu.”

²⁰ Awor, tabatin shete ruman hòmber. E mayó a kasa i muri bai sin laga yu.

²¹ Esun di dos a kasa ku e biuda; e tambe a muri bai sin laga niun yu atras. A pasa meskos ku e di tres tambe.

²² Asina a pasa ku tur e shete rumannan. Nan niun no a laga yu atras i por último e muhé mes a muri bai.

²³ Awor riba dia di resurekshon, ora nan lanta for di morto, ta kasá di ken e muhé lo ta? Tur tabata kasá kuné tòg?’

²⁴ Hesus a kontestá: ‘Boso ta kibuká komo boso no konosé Skritura ni poder di Dios.

²⁵ Ora hende lanta for di morto nan lo no kasa ni lo no kasa nan, pero nan lo ta manera angel den shelu.

²⁶ Loke ta e asuntu di resurekshon: boso no ta lesa den buki di Moises, den e parti di e mata na kandela, kon Dios a bisa Moises: Mi ta Dios di Abraham, Dios di Isak i Dios di Yakob?

²⁷ Dios no ta Dios di morto sino di bibu. Boso ta kompletamente robes.’

E mandamentu di mas importante

²⁸ Un sierto dòktor di lei ku a bini einan, a tende e diskushon. El a mira ku Hesus a duna nan un bon kontesta; p'esei el a puntr'É: ‘Kua mandamentu ta e mandamentu di mas importante?’

²⁹ Hesus a kontest'é: ‘E mandamentu di mas importante ta: “Skucha, Israel! Señor, nos Dios, so ta Dios.

³⁰ Stima Señor, bo Dios, di henter bo kurason, ku henter bo alma, ku henter bo mente, i ku tur bo forsa.”

³¹ E di dos mandamentu mes importante: “Stima bo próhimo manera bo ta stima bo mes.” No tin niun otro mandamentu ku ta mas importante ku esakinan.’

³² E dòktor di lei a bisa Hesus: ‘Bon bon, Maestro! Bèrdat, ta un Dios so tin i no tin niun otro dios ku n' t'E so.

³³ Ta asina ku hende mester stima Dios di henter su kurason, ku henter su komprondementu i ku tur su forsa. Tambe e mester stima su próhimo manera e ta stima su mes. E kosnan akí ta muchu mas importante ku sakrifisio di kandela i otro sakrifisio.’

³⁴ Hesus a mira ku e dòktor di lei a papia ku sabiduria; p'esei El a bis'é: ‘Bo no ta leu fo'i reino di Dios.’ Niun hende no a tribi puntra Hesus nada mas.

David i Mesias

³⁵ Ora Hesus tabata duna siñansa den tèmpel, El a puntra: ‘Ta kon e dòktornan di lei por bisa ku Mesias ta yu di David?

³⁶ David mes, guiá pa Spiritu Santu, ta bisa: “Señor Dios a bisa mi Señor: Sinta Bo na mi man drechi, te ora Mi pone bo enemigunan na bo pia.”

³⁷ Awor, si David mes ta yam'É Señor, ta kon bini e Mesias por ta yu di David?’ E multitut grandi tabata skucha Hesus ku plaser.

Hesus ta bisa pa tene kuidou ku e dòktornan di lei

³⁸ Durante su siñansa, Hesus a atvertí: ‘Tene kuidou ku e dòktornan di lei ku gusta kana rònt den paña largu i laga hende kumindá nan ku rèspèt na plasa.

³⁹ Tambe nan ta buska e mihó lugánan pa sinta den snoa i na fiesta e lugánan di honor.

⁴⁰ Nan ta hòrta propiedat di biuda; i nan ta hasi orashon largu djis pa bista di hende. Ma nan sentensia lo ta hopi mas pisá!’

E biuda pober ku e ofrenda di dos moneda di koper

⁴¹ Sintá banda di e kaha di ofrenda, Hesus tabata mira kon e hendenan tabata tira sèn aden. Hopi hende riku tabata tira hopi sèn,

⁴² ma a drenta un biuda pober ku a tira dos moneda chikí di koper, ku no tabata bal muchu.

⁴³ Hesus a yama su disipelnan i bisa nan: ‘Mi ta sigurá boso ku e biuda pober a tira mas tantu sèn den e kaha di ofrenda ku tur e otronan,

⁴⁴ pasobra nan a duna di nan rikesa. Ma e biuda ku tabata den nesesidat, a tira tur loke e tabatin pa e biba di dje.’